निर्वाचन नजिकिँदै गर्दा प्रधानमन्त्री सुशीला कार्कीले राजनीतिक छलफल तीव्र बनाएकी छिन्। राष्ट्रपति रामचन्द्र पौडेलले पनि नेताहरूसँग लगातार भेटवार्ता गरिरहेका छन्।
शनिबार प्रधानमन्त्री कार्कीले तीन दलका शीर्ष नेताहरूलाई छलफलमा बोलाइन्। छलफलमा नेकपा एमालेका तर्फबाट अध्यक्ष केपी शर्मा ओली, नेपाली कम्युनिस्ट पार्टीबाट अध्यक्ष पुष्पकमल दाहाल 'प्रचण्ड' र कांग्रेसबाट सभापति शेरबहादुर देउवा सहभागी थिए।
यो छलफलमा ओली र प्रचण्ड सहभागी हुनु स्वाभाविक हो। उनीहरू पार्टीको शीर्ष पदमा छन् र कार्यकारी भूमिका पनि आफैले सम्हालेका छन्।
तर देउवा?
कांग्रेसको शीर्ष पदमा भए पनि देउवा कार्यकारी भूमिकाबाट घोषित रूपमै अलग छन्। उनले जेनजी आन्दोलनपछि पार्टी केन्द्रीय समितिमा घोषणा नै गरेर कार्यवाहक सभापतिको जिम्मेवारी उपसभापति पूर्णबहादुर खड्कालाई दिइसकेका छन्।
त्यो भनेको सभापतिको सबै कार्यभार र जिम्मेवारी खड्कालाई सुम्पिएको हो।
यसरी सारा दुनियाँले देख्ने र सुन्नेगरी कार्यवाहक सभापति खड्कालई दिएका देउवा अहिले सभापतिका रूपमा आफै सक्रिय छन्। जबकि खड्कालाई दिएको कार्यवाहक सभापति पद उनले फिर्ता लिएका छैनन्।
अस्ति शीतल निवासमा राष्ट्रपति पौडेलसँग र आज बालुवाटारमा प्रधानमन्त्री कार्कीसँगको भेटघाट र छलफलमा कांग्रेस सभापतिका रूपमा देउवा नै सहभागी भए।
खड्कालाई कार्यवाहक सभापति दिएर उपचारका लागि सिंगापुर गएका देउवा त्यहाँबाट फर्केदेखि राजनीतिक छलफल र परामर्शमा आफै संलग्न छन्। त्यसयता देउवा पार्टीको आन्तरिक राजनीतिमा मात्रै नभई राष्ट्रिय राजनीतिमा पनि सक्रिय रहँदै आएका छन्।
त्यसले कार्यवाहक सभापति खड्काको भूमिका गौण बनाएको छ।
देउवाले आफूले दिएको कार्यवाहक सभापति निष्प्रभावी बनाए पनि खड्काले यसबारे केही बोलेका छैनन्। न उनले कार्यवाहक फिर्ता गरेका छन्, न देउवासँग कुनै गुनासो गरेका छन्।
उनी एक किसिमले निरीह देखिएका छन्।
यसको फाइदा उठाउँदै देउवाले आफूखुसी 'सभापति' पद प्रयोग गरेका छन्।
संस्थापन पक्षले महाधिवेशन टार्न खोजेर पेचिलो बन्दै गएका पार्टीका औपचारिक बैठक भने देउवाले छल्ने गरेका छन्। ती बैठकको सभापतित्व खड्काले नै गरिरहेका छन्।
खड्का अड्कलेर बोल्छन्। ठिक वा बेठिक छुट्ट्याएर पार्टीभित्र समर्थन वा विरोध गर्ने आँट देखाउँछन् भन्ने पनि उनको छवि।
यसपालि भने खड्काले मौनता साधेका छन्। कार्यवाहक सभापतिको जिम्मेवारी पाएर त्यसको भूमिका निर्वाह गर्न नपाउँदा पनि खड्का यसबारे बोलेका छैनन्। उनले न पद छाड्न सकेका छन्, न पद अनुसारको जिम्मेवारी दाबी गर्न सकेका छन्।
खड्काको निष्क्रियता र देउवाको सक्रियतालाई लिएर पार्टीभित्र प्रश्न उठ्न थालेको छ।
कांग्रेस महामन्त्री गगन थापाले यसबारे सार्वजनिक रूपमै बोलेका छन्।
'पार्टी सभापतिज्यूले कार्यवाहक दिनुभएको छ, तर नाम मात्रको,' केन्द्रीय कार्यसम्पादन समिति बैठकपछि बुधबार सानेपामा पत्रकारहरूसँगको कुराकानीमा महामन्त्री थापाले भने, 'सभापतिज्यू बैठकमा आउनुभएको छैन तर बाँकी सबै शक्ति अभ्यास त्यहीँबाट भइरहेको छ।'
बिपी स्मृति भवनमा पत्रकारहरूसँग उनले थप भने, 'सभापतिज्यूले केन्द्रीय समितिमा उपस्थित भएर कार्यवाहक दिनुभएको थियो। देशभरका नेता तथा कार्यकर्ताले अब सभापतिजी अभिभावकीय भूमिकामा रहनु हुन्न भन्ने आशा गरेका थिए। तर त्यस्तो भएन। शक्तिको अभ्यास उहाँले गर्दै आउनुभएको छ। सभापतिज्यूलाई खुला आग्रह छ, पार्टीको सर्वोत्तम हितका लागि चिन्ता गर्नुहोस्।'
-1756794700.JPG)
-1746009348.jpg)
