गगन थापा नेतृत्वको नवनिर्वाचित नेपाली कांग्रेस केन्द्रीय कार्यसमितिमा दाङका चार जना समेटिएका छन्।
दाङको क्षेत्र नं. १ बाट प्रतिनिधित्व गर्ने योगेन्द्र चौधरी (थारू) क्लस्टरबाट सहमहामन्त्री बनाइएका छन्।
उनी यसअघि शेरबहादुर देउवा नेतृत्वको कार्यसमितिमा निर्वाचित केन्द्रीय सदस्य थिए।
चौधरीलाई कांग्रेसले पछिल्लो समय क्रियाशील सदस्यता छानबिन समितिको सदस्य बनाएको थियो।
गत भदौमा मात्रै चौधरी थारु विभागको प्रमुख बनाइएका थिए।
कांग्रेसले चौधरीलाई दाङ क्षेत्र नं. १ बाट फागुन २१ मा हुने प्रतिनिधिसभा सदस्य पदमा उम्मेदवारका लागि १ नम्बरमा नाम सिफारिस गरेको छ।
थरुहट नेताको रुपमा पहिचान बनाएका चौधरी विजयकुमार गच्छदार नेतृत्वको तत्कालीन फोरम लोकतान्त्रिकबाट संविधानसभा सदस्य बनेका थिए। पार्टी समायोजनका क्रममा उनी कांग्रेस प्रवेश गरेका थिए।
दाङका पाँचमध्ये एक जना केन्द्रीय सदस्य मात्रै विशेष महाधिवेशनमा सहभागी भएका थिए।
प्रदेशसभा सदस्य तथा स्वं.खुमबहादुर खड्काका छोरा अनुराग खड्कासहित घोराहीका दुई वडाध्यक्ष, दंगीशरणका १ र बबइका १ गरी चार जना वडाध्यक्ष मात्रै विशेष महाधिवेशनमा सहभागी भएका थिए।
त्यस्तै थापा नेतृत्वको कार्यसमितिमा दाङको क्षेत्र नं. ३ बाट प्रतिनिधित्व गर्ने केशव आचार्य केन्द्रीय सदस्यमा निर्वाचित भएका छन्।
२०७४ को निर्वाचनमा नेकपा (एमाले) बाट दाङको क्षेत्त नं. ३ (२) बाट लुम्बिनी प्रदेशसभामा निर्वाचित उत्तरकुमार वलीको सवारी दुर्घटनामा मृत्यु भएपछि २०७६ मंसिर १४ मा भएको उपनिर्वाचनमा कांग्रेसले नेता आचार्यलाई उम्मेदवार बनाएको थियो।
त्यो उपनिर्वाचनमा आचार्य उत्तरकी पत्नी विमला केसी वलीसँग पराजित भएका थिए।
पूर्व मन्त्री केन्द्रीय सदस्य दीपक गिरीको नजिकका मानिने आचार्य पछिल्लो समय गगन टिममा सामेल भएका थिए।
दाङको क्षेत्र नं. १ का प्रदिप शर्मा र क्षेत्र नं. २ की लिला नेपाली विशेष महाधिवेशनबाट नेपाली कांग्रेसको केन्द्रीय सदस्यमा सर्वसम्मत निर्वाचित भएका छन्।
-1746009348.jpg)
