नेपाली कांग्रेसका नेता शेखर कोइरालाले सबै पक्षलाई घर फर्कन आह्वान गरेका छन्।
विशेष महाधिवेशनबाट नयाँ नेतृत्व चयन गरेपछि बिहीबार विज्ञप्ती जारी गर्दै नेता कोइरालाले सबैलाई फर्कन अपिल गरेका हुन्।
'पार्टीभित्र गर्नुपर्ने सुधारका प्रक्रिया रोकिने छैनन्। म आह्वान गर्छु:हामी सबै घर फर्कौं, कांग्रेसमा फर्कौं। यहाँ जितहार कसैको छैन। सबैको विन–विन अवस्थामा हामी अगाडि बढ्न सक्छौं,' उनले भनेका छन्।
उनले कांग्रेसलाई एकतावद्ध राख्ने प्रयास विफल हुनुपछाडि दोषी को हो भन्नेबारे पनि अहिले केही नबोल्ने बताए।
'दोषी को निर्दोष भन्ने कुरा गरेर राष्ट्रिय राजनीतिलाई थप धुमिल पार्न म चाहन्नँ। हामी सबै कही न कही चुकेको कुरा स्वीकार्न मलाई कुनै संकोच छैन,' उनले भने।
त्यसको समीक्षा र यसमा व्यक्तिको भूमिकाबारे मूल्यांकन गर्ने जिम्मेवारी इतिहासलाई सुम्पने उनले बताए।
'राजधानीमा षडयन्त्रको अनेकन् राष्ट्रिय र अन्तर्राष्ट्रिय तानाबाना बुनिए र कांग्रेसलाई कमजोर पार्न चाहनेको स्वार्थलाई हामीले रोक्न सकेनौं,' उनल भने।
यस्तो अवस्थामा विपी कोइरालाको भूमिकालाई स्मरण गुर्नुपर्ने बताए।
'विपी कोइराला नियतिमा विश्वास गर्नुहुन्थ्यो । म आज यतिखेर कांग्रेस एकढिक्का भएर अगाडि बढ्न नसक्नुलाई पनि त्यही नियतिको कठोर सत्य भनेर बुझ्छु,' उनले भनेका छन्।
अब कांग्रेससामु आसन्न निर्वाचनमा जाने र ८ दशक लामो कांग्रेस इतिहासको गौरवलाई जोगाउने जिम्मेवारी रहेको उनले बताए।
'आज एकपटक फेरी तपाई हामी हाम्रा सबै अग्रज नेताहरुको मार्ग दर्शनबाट र शहिदहरुको बलिदानलाई सम्झेर नेपाली जनताको समृद्धिको यात्रामा जनताको घर दैलोमा भोट माग्न जानु परेको छ । समय छोटो छ, तर पनि यथासम्भव तपाईहरुको घर आंगनमा कांग्रेसको चुनावी अभियानमा म आउने कोशिस गर्दछु,' उनले भनेका छन्।
-1746009348.jpg)
