नेकपा एमालेका अध्यक्ष केपी शर्मा ओलीले राष्ट्रिय स्वतन्त्र पार्टी (रास्वपा) का सभापति रवि लामिछानेको सम्पत्ति शुद्धीकरण र संगठित अपराध सम्बन्धी अभियोग फिर्ताबारे टिप्पणी गरेका छन्।
बिहीबार काठमाडौंमा आयोजित कार्यक्रममा अध्यक्ष ओलीले महान्यायाधिवक्ताको कार्यालयले एकपछि अर्को काण्ड रचेको भन्दै आपत्ति जनाए। रवि लामिछानेको मुद्दा फिर्ताका लागि सहमति त्यसैको निरन्तरता भएको ओलीको आरोप थियो।
‘अहिले हामीले देखिराखेका छौं, नेपालमा कस्तो सरकारका छ, कस्तो शासन छ, दुनियाँमा कस्तो शासन छ छ, कस्तो सरकार छ? त्यसको प्रतिविम्ब नेपालमा पनि छ। अब कसैलाई कुनै कानुन लाग्दैन, कुनै मुद्दा लाग्दैन, कसैको सम्पत्ति खाए पनि खान मजाले पाइन्छ। मुद्दा लाग्दैन। हिजो भुलचुकले मुद्दा लागेको रहेछ भने पनि माफी मिनाहा हुन्छ। अभियोग परिवर्तन गरिन्छ। अभियोग फेरिन्छ। अभियोगबाट बरी गरिन्छ। चुनावमा हिरो बनाएर अगाडि सारिन्छ,’ ओलीले भने।
नेपाली सरकार, नेपाली अर्थतन्त्र, नेपाली संस्कृति, नेपाली सभ्यताका कुरा गर्छ भने घरबाट बाहिर निस्कन नदिने, त्यसलाई मार्ने, काट्ने आदि भएको ओली आरोप थियो।
८२ वर्षीया नेता, नेपाली कांग्रेसका सभापति शेरबहादुर देउवामाथि भौतिक आक्रमण भएको ओलीको भनाइ थियो।
‘त्यति असभ्य पनि हुन्छ समाज? उनकै पार्टीका नेता हुँ भन्ने मानिसहरू विरोधमा एक शब्द बोलेनन्। सहानुभूतिसम्म व्यक्त गरेनन्। कहाँ पुग्यो नेपाल? कुन खालको राजनीतिमा पुग्यो? आज थिति र विधिको शासन होइन, जसको लाठी त्यसको भैँसीजस्तो शासन छ। नेपालमा पनि स्थापना भएको छ। यसैगरी चलेको छ,’ उनले भने।
महान्यायाधिवक्ताको कार्यालय इतिहाससम्मका लागि कलंकित भएको भन्दै ओलीले टिप्पणी गरे।
‘लज्जाको विषय बनेको छ। यस्तो पनि हुन्छ? यसो बिर्सौं भन्यो, डिम्बका कारोबार बिर्सौं भन्यो फेरि अर्को काण्ड, अर्को काण्ड बिर्सौं भन्यो, अर्को काण्ड! अहिले अभियोग परिवर्तनका काण्ड मुद्दा फिर्ताका काण्ड, दुनियाँका पैसा महान्यायाधिवक्ताको कार्यालयले तिर्छ? देश कहाँ पुग्यो, यसका विरूद्ध आज पनि संघर्ष छ। हामी नेपालमा नेपालको सरकार बनाउन चाहन्छौं,’ उनले भने।
-1746009348.jpg)
