पूर्वमन्त्री कुलमान घिसिङ अध्यक्ष रहेको उज्यालो नेपाल पार्टीले एकता गरेको राष्ट्रिय परिवर्तन पार्टीसँग जेनजी प्रतिनिधि उपार्जुन चाम्लिङले तीन विषयमा स्पष्टता माग राखेका छन्।
बिहीबार साँझ सामाजिक सञ्जालमा उनले 'ध्यानाकर्षण' लेख्दै राष्ट्रिय परिवर्तन पार्टीलाई 'शंकास्पद समूह' भनेका छन्।
उपार्जुन सुदन गुरूङ संयोजक रहेको काउन्सिल अफ जेनजीका कोशी संयोजक हुन्।
उनले राष्ट्रिय परिवर्तन पार्टीले आफूहरू जेनजीको पाटी बताए पनि २०८१ सालमै दर्ता भएकाले 'एकदमै शंकास्पद' भएको बताएका हुन्।
उनले पार्टीको आर्थिक स्रोत र खर्च प्रणालीबारे पनि प्रश्न राखेका छन्।
त्यस्तै यो पार्टी कुनै धार्मिक समूहको स्वार्थ अनुसार नचल्ने सार्वजनिक प्रतिबद्धताको पनि माग उपार्जुनले राखेका छन्।
'कुनै धार्मिक समूह (कल्ट) र विदेशी नागरिक/शक्तिको स्वार्थ अनुसार नचल्ने सार्वजनिक प्रतिबद्धता,' उनले लेखेका छन्।
किरात समुदाय प्रति नकारात्मक गतिविधि नगर्ने प्रतिबद्धता पनि उनले खोजेका छन्।
'किरात समुदायको विश्वास पद्धति, संस्कृति र पहिचानप्रति कुनै पनि नकारात्मक गतिविधि नगर्ने सार्वजनिक प्रतिबद्धता,' उनले लेखेका छन्।
उनले स्पष्टता नआएमा कोशी प्रदेशका १४ वटै जिल्लामा बहिष्कारको नीति अपनाउने चेतावनी समेत दिएका छन्।
राष्ट्रिय स्वतन्त्र पार्टी (रास्वपा) सँग एकता भंग भएपछि उज्यालो नेपाल पार्टीले समानुपातिक सूची अद्यावधिक गर्नका निम्ति राष्ट्रिय परिवर्तन पार्टीसँग एकता गरेको थियो।
-1767156750.jpeg)
