आफ्नो निर्वाचन क्षेत्र छाडेर नेपाली कम्युनिस्ट पार्टीका नेता नारायणकाजी श्रेष्ठ यसपालि चुनाव लड्न सर्लाही जाने भएका छन्।
सर्लाही–३ बाट फागुन २१ मा हुने प्रतिनिधिसभा निर्वाचनका लागि केन्द्रीय सदस्य रामेश्वर राय यादव, पूर्व प्रदेशसभा सदस्य राजकुमार राय यादवसहित नेता नारायणकाजी श्रेष्ठ पनि उम्मेदवार सिफारिस भएका थिए।
श्रेष्ठ आफैले यसपालि मधेसबाट चुनाव लड्ने आकांक्षा देखाएपछि उनी सर्लाही–३ बाट चुनाव लड्ने करिब निश्चित भएको हो।
तर उनको उम्मेदवारीलाई लिएर नेकपाभित्रै विरोध भएको छ।
नारायणकाजी सर्लाही जाने भएपछि सिफारिसमा परेका अर्का नेता रामेश्वर राय यादवले असन्तुष्टि जनाएका छन्।
स्थानीय स्तरमा भिजेका नेताहरूलाई बेवास्ता गरी केन्द्रबाट उम्मेदवार तोकिएको भनेर विरोध जनाएपछि शनिबार यादवसहित उनी पक्षका नेताहरूसँग पेरिसडाँडामा छलफल भएको थियो।
सो क्रममा पार्टी संयोजक पुष्पकमल दाहाल 'प्रचण्ड', सह–संयोजक माधवकुमार नेपाल, नेता नारायणकाजी श्रेष्ठसहितले नेता यादवसँग छलफल गरेका थिए। यसपालि आफ्नै नेता जाने भनेपछि त्यसमा सहयोग गर्न यादवलाई शीर्ष नेताहरूले सुझाएका थिए।
'तपाईंमाथि अन्याय हुने भएको देखियो। तर पार्टीका वरिष्ठ नेताले नै आकांक्षा देखाएपछि उहाँलाई जिताउन भूमिका खेल्नुस्,' पार्टी संयोजक प्रचण्डले नेता यादवलाई भनेका थिए।
यसबारे नेता यादवले असन्तुष्टि जनाएका थिए।
'वरिष्ठ नेता उहाँ मात्रै होइन। अरू पनि हुन्छन्। मलाई अन्यत्र दिनुस् त उसो भए! उहा गोर्खामा किन नलड्ने,' नेता यादवको भनाइ उद्धृत गर्दै छलफलमा सहभागी एक नेताले बताए।
नेता यादवले सर्लाही–३ कै नेतालाई उम्मेदवार बनाउनुपर्ने भनेर आफूले प्रस्ट भनेको बताए।
'देशभरिका नेता कार्यकर्ताहरूले रगत पसिना बगाएर संगठन निर्माण गरेको हुन्छ। त्यसलाई प्राथमिकता दिनुपर्छ। त्यसलाई अगाडि बढाउनुपर्छ। उसले त्यस ठाउँका जनताको पिरमर्का बुझेको हुन्छ। उहाँलाई हाम्रो गाउँको मर्म के हो, थाहा हुन्छ,' उनले भने।
आफूले असन्तुष्टि राखेपछि पुनः छलफलमा बस्नेगरी पेरिसडाँडाबाट फर्किएको उनले बताए।
उहाँहरूले फेरि बोलाउनुभएको छ तर म नजान सक्छु। रातभरिमा निर्णय गर्नुहोला,' उनले भने।
नेता यादव विजयकुमार गच्छदार नेतृत्वको तत्कालीन सद्भावना पार्टीबाट २०७४ सालमा त्यति बेलाको माओवादी केन्द्र प्रवेश गरेका थिए।
२०७४ मा उनी सर्लाही–३ बाटै निर्वाचित भएका थिए। २०७९ मा सर्लाही–३ बाट नरेन्द्र साहले टिकट पाए पनि उनी पराजित भएका थिए।
यसपालिको चुनावमा यादव आकांक्षी थिए।
नेकपाका सर्लाही संयोजक रहेका प्रह्लाद बुढाथोकी भने उम्मेदवार टुंगो लगाउने समयमा पार्टीभित्र केही मतभेद हुनु सामान्य रहेको बताउँछन्।
'केही साथीहरूले विरोध गर्नु भएको छ। त्यसलाई छलफल गरेर मिलाउँछौं,' उनले भने।
यद्यपि पार्टीको वरिष्ठ नेता चुनाव लड्न आउने आफ्नो जिल्ला र निर्वाचन क्षेत्रका लागि सम्मानको कुरा हुने उनी बताउँछन्।
'पार्टी व्यक्तिको होइन। पार्टीले निर्णय गरेपछि त्यसमा सफल हुन नेता, कार्यकर्ता सबैले सहयोगी भूमिका खेल्नुपर्छ। यसपालि वरिष्ठ नेता नै आउने भएपछि त्यो हाम्रो लागि अझै सम्मानको कुरा हुन्छ। असन्तुष्टिहरू समाधान हुन्छन्,' उनले भने।
-1746009348.jpg)
