नेकपा एमालेका अध्यक्ष केपी शर्मा ओलीले प्रतिनिधिसभाका आफ्ना उम्मेदवारहरूलाई मतदाताका प्रश्नहरू धैर्यपूर्वक सुन्न आग्रह गरेका छन्।
सामाजिक सञ्जाल फेसबुकमार्फत् उनले मतदातालाई पार्टीले गरेका कामहरूको स्पष्ट विवरण सुनाउन भनेका हुन्।
'देशभर चुनावी मैदानमा खडा भएका हाम्रो पार्टी नेकपा (एमाले) का उम्मेदवार र प्रचारक साथीहरूलाई मेरो आग्रह छ – मतदातालाई हामीले गरेका कामहरूको स्पष्ट विवरण सुनाउनुहोस्। उहाँहरूको प्रश्न धैर्यपूर्वक सुन्नुहोस्। किनकि एमाले प्रश्नहरूको अग्निपरीक्षाबाट खारिएर बनेको राजनीतिक विरासत हो,' उनले भनेका छन्।
परिपक्व लोकतन्त्रमा भोट भावना भड्काएर होइन, तथ्य प्रस्तुत गरेर माग्नुपर्ने उनको भनाइ छ।
मतदाताबाट बहकाउमा होइन, कामको हिसाब सुनाएर मत माग्नुपर्ने पनि उनले बताएका छन्।
'मतदातालाई भ्रमको डिजिटल इको च्याम्बरभित्र कैद गरेर होइन, उम्मेदवारसँग आँखा जुधाएर, प्रश्न गर्ने अवसर दिएर, उत्तर सुनाएर, सत्य छुट्ट्याएर मतदान गर्ने अवसर दिनुपर्छ। साइको थ्रेटले भन्छ– चुपचाप छाप। स्वस्थ निर्वाचन संस्कृतिले भन्छ– आँखा जुधाएर विमर्श र निर्णय। त्यसैले हाम्रो आह्वान– चुपचाप छाप होइन, सोचीविचारी छाप। आँखा खोलेर भविष्य निर्माण,' ओलीको भनाइ छ।
-1746009348.jpg)
