राष्ट्रिय स्वतन्त्र पार्टीका उम्मेदवारले भोट माग्दै हिँडेका बेला सुप्रिम बचत तथा ऋण सहकारी संस्था लिमिटेडका पीडितहरूले प्रदर्शन गरेका छन्।
बुधबार दिउँसो रूपन्देहीको निर्वाचन क्षेत्र नं. २ अन्तर्गत बुटवल उपमहानगरपालिका वडा नं. ११ होराइजन चोकमा रास्वपा उम्मेदवार शुलभ खरेलले घरदैलो गर्ने क्रममा सहकारी पीडितहरूले प्रदर्शन गरेका हुन्।
'तिम्रो नेता खोई? लिएर आऊ, जेनजीका माग कस्ले पूरा गर्छ? सिंहदरबार किन जलाएको?' लगायतका नारा लेखिएका प्लाकार्ड बोकेर नाराबाजी गरेका थिए।
नाराबाजी गरेको देखेपछि घरदैलो अभियानमा रहेका शुलभ नजिकैको होटलभित्र छिरेका थिए।
सुप्रिम सहकारीका १० हजार ३ सय ९१ जना बचतकर्ताको ७८ करोड ५० लाख रुपैयाँभन्दा बढी रकम अपचलन भएको छ।
अधिकांश बचतकर्ताहरू न्यून आय भएका छन्। उनीहरूले तीन वर्षदेखि रकम पाउन संघर्ष गर्दै आएका छन्।
'हामी पीडितको पैसा खाएका मान्छे खुलेआम हिँड्ने, पैसा फिर्ता नहुने?' पीडितहरूले सामूहिक प्रश्न गरिरहेका छन्।
सहकारी पीडितले आफ्नो प्रचार अभियानमा प्रदर्शन गरेको वा लखेटेको विषयमा उम्मेदवार खरेलले भने अनभिज्ञता प्रकट गरे।
'म त बिहान १२ बजेतिर उक्त होटलमा खाना खान गएको हो। कोही पनि थिएनन्,' खरेलले भने, 'यो त अचम्मको कुरा भयो।'
सुप्रिम बचत तथा ऋण सहकारीको १४ करोड २९ लाख रुपैयाँ भन्दा बढी रकम गोर्खा मिडिया नेटवर्क प्रालिमा लगानी भएको पाइएको छ। यसमध्ये २ करोड रुपैयाँ प्रक्रिया पूरा नगरी रवि लामिछानेको नाममा ऋण लिएको पाइएको छ।
गोरखा मिडिया नेटवर्कले ११ फागुन २०७७ मा ग्यालेक्सी टिभी सञ्चालनमा ल्याएको थियो। गोर्खा मिडिया नेटवर्कमा सुरूमा गितेन्द्रबाबु राई र छविलाल जोशी शेयर सदस्य थिए। त्यसबेला राई र जोशीको समान २ लाख ५० हजार कित्ता सेयर थियो।
सुप्रिमको रकम अपचलनमा संलग्न रहेको अभियोग लागेका रास्वपा अध्यक्ष रवि लामिछानेले सहकारी ठगी तथा संगठित अपराध मुद्दामा रूपन्देही जिल्ला अदालतबाट धरौटीमा रिहा भएका छन्। उनले सोमबार मात्रै तारेख लिएका थिए।
-1770813067.jpg)
-1746009348.jpg)
