नेपाली कांग्रेसका नेता तथा नुवाकोट क्षेत्र नम्बर १ का उम्मेदवार प्रकाशशरण महतले कुराभन्दा काम गर्ने उम्मेदवारका रूपमा आफू परिचित रहेकोले जनताले चुनाव जिताउने बताएका छन्।
उनले नुवाकोटलगायत देशभर कांग्रेसका उम्मेदवार बलियो स्थितिमा रहेको पनि दाबी गरेका छन्।
कांग्रेसका उम्मेदवार र कार्यकर्ता जनताका लागि सुख दुःखका साथी भएकाले जुनसुकै अवस्थामा उपलब्ध हुने उनको भनाइ थियो।
‘वैकल्पिक भनिएका शक्तिहरूको शिर र पुच्छरको अत्तोपत्तो छैन। कहाँबाट आउँछन्, कहाँ हराउँछन् पत्तो छैन। सामाजिक संजालको प्रभावले आइरहनु भएको छ। हामीसँग संगठन छ, इतिहास छ। लामो समयदेखि जनतासँग जोडिरहेका छौं। दिगो रुपमा काम गरिरहेका छौं र अस्तित्वमा छौं,’ महतले भने, ‘७५ वर्षको इतिहासमा धेरै चुनौतिहरूको सामना गरेका छौं, उतारचढाव व्यहोरेका छौं। त्यही कारणले कांग्रेस टिकेको छ। नयाँ हुँदैमा राम्रो हुने होइन तर हामी सुखदु:ख र अफ्ठयारो अवस्थामा साथमा छौं, त्यसैले हामी यस पटक पनि थप बलियो रुपमा स्थापित हुनेछौं।’
नुवाकोटको सन्दर्भमा आफू उर्जामन्त्री वा अर्थमन्त्री हुँदा साथै विभिन्न चरणमा काम गरेर देखाइसकेकाले यस पटक पनि मतदाताले आफूलाई नै रोज्ने उनको भनाइ छ।
‘म प्रत्यक्ष निर्वाचन नलडे पनि धेरै काम गरेको छु। परिपक्व, इमान्दार र काम गर्नसक्ने व्यक्तिको पहिचान बनाइसकेको छु। त्यसैले मतदाताले मलाई रोज्नेछन्,’ उनले भने,‘गारोसारो र अफ्ठयारो अवस्थामा पनि महतले काम गर्छ भन्नेमा नुवाकोटवासी विश्वस्त छन्।’
नुवाकोटको विकासमा वितेको १० वर्ष कांग्रेसको प्रतिनिधित्व नभएकाले काम नभएको बताउँदै उनले आफूले १० वर्षको क्षतिपूर्ति दिनेगरी आफ्नै अगुवाइमा विकासका लागि करिब सात अर्ब जति विनियोजन गराएको उनको दाबी छ।
‘यतिबेला आश्वासन दिन सजिलो छ। कुलो र कुरो जता लगे त्यतै मोडिन्छ। यसबारे मतदाता सचेत छन्। हाम्रै अगुवाइमा नुवाकोटमा धेरै काम भएको छ। १० वर्ष हाम्रो प्रतिनिधित्व नहुँदा कामै भएन तर त्यसको क्षतिपूर्ति कांग्रेसले दिलाउने प्रयासमा छ। सडक पूर्वाधारका क्रममा ककनीको बाटो हालत थियो, धुलो र हिलोबाट सबैलाई हैरानी दिएको थियो। त्यो बाटोमा एक अर्ब २० करोड विनियोजन गरेर धेरै काम भएको छ, गगंटेबाट गोल्फू भन्ज्याङ जाने बाटोमा एक अर्ब ३३ करोड सुनिश्चित मैंले नै गरेकाले ठेक्का लागेर काम अघि बढिसकेको छ। त्यो बाटोले दुवै क्षेत्र एवम सिन्धुपाल्चोकसँग जोड्ने र काठमाडौंसँगको दूरी छोटो बनाउने । कृषि, पर्यटन र व्यवसायमा सहज हुनेछ। छहरे–टोखा बाटो जिर्ण थियो, त्यसका लागि म अर्थमन्त्री भएका बेला आठदश करोड विनियोजन गरेर तत्कालै काम अघि बढाएर हाल धेरै सहज भएको छ। ओखरपौवादेखिको बाटोमा पनि ११ करोड विनियोजन गरेर सहज बनाएको छु,’ उनले भने।
आफ्नै पहलमा तीनमुखे झोलुङ्गे पुलको काम अघि बढाएको साथै पन्चकन्याकै छहरेदेखि घलेगाउँसम्म जाने बाटोमा १५ करोड लगानी गरेकाले धेरै सहज बनाएको उनले बताए। चौघडाको वाहुनबेसीसम्म जाने पुल निर्माणले आवात जावतमा सहज भएको उनले बताए। त्यस्तै सिंचाइ क्षेत्रमा ठूलो लगानी भित्र्याएकाले कृषकहरूलाई धेरै सहज भएको उनले बताए।
-1746009348.jpg)
