नेपाली कांग्रेसका उपसभापति विश्वप्रकाश शर्माले फागुन २१ गते हुने निर्वाचनबाट नेपाली कांग्रेस सबभन्दा ठूलो दलको रूपमा स्थापित हुने दाबी गरेका छन्।
बिहीबार भैरहवामा आयोजित रूपन्देहीका उम्मेदवार सहित अगुवा कार्यकर्ता भेलालाई सम्बोधन गर्दै शर्माले निर्वाचनमार्फत् मुलुककै पहिलो शक्ति बन्ने आत्मविश्वासका साथ नेपाली कांग्रेस चुनावी अभियानमा लागेको बताए।
‘हाम्रो आत्मविश्वासले मात्र होइन, विभिन्न क्षेत्रका एजेन्सीहरूले गरेका सर्वेक्षणले पनि नेपाली कांग्रेस पहिलो दल बन्दै चुनाव जित्दै छ,’ उनले भने।
शर्माले कुनै दल वा उम्मेदवारले मात्र जित्ने नभई देशले जित्ने कि हार्ने भन्ने यस पटकको निर्वाचनको मुख्य प्रश्न रहेको भन्दै देशलाई जिताउनको लागि नेपाली कांग्रेसले जित्नुपर्ने दाबी गरे।
‘कुनै दल वा उम्मेदवारले जित्ने र हार्ने कुरा नेपाली कांग्रेसका लागि नौलो कुरा होइन, देशले जित्ने कि हार्ने भन्ने मुख्य प्रश्न हो, शर्माले भने।
शर्माले २०८४ सालमा हुनुपर्ने चुनाव २०८२ सालमा किन हुँदैछ, ७४ जना आमाहरूको काख किन रित्तिए, देशको सिंहदरबार, संसद भवन, सर्वोच्च अदालत किन जल्यो, अर्बौं खर्बौंको क्षति किन भयो भन्ने विषयमा गम्भीर समीक्षा गरेर मात्र मतदान गर्न मतदातालाई भन्नुपर्ने बेला आएको बताए।
उनले जेनजी आन्दोलनको नाममा सिंहदरबार, सर्वोच्च अदालत, सर्वोच्च अदालत लगायत राज्यका महत्त्वपूर्ण सम्पदाहरू मात्र जलेको नभई दलहरू बीचको विश्वास र मान्छे मान्छे बीचको स्नेह समेत जलेको भन्दै जलेका मनहरूलाई जोड्ने काम नेपाली कांग्रेसले गर्न सक्ने बताए।
‘जलेका सिंहदरबार, संसद भवन, सर्वोच्च अदालत मात्र छैनन्, एउटा दल र अर्को दलको बीचको विश्वास जलेको छ। एउटा मान्छे र अर्को मान्छे बीचको स्नेह जलेको छ। यस्तो बेलामा सबैलाई समेट्ने तागत नेपाली कांग्रेससँग मात्र छ,’ शर्माले भने।
उनले विगतका इतिहासलाई हेर्दा पनि २००७ सालको राणा शासनको अन्त्य, २०१५ सालको निर्वाचन, २०४६ सालमा पञ्चायती व्यवस्थाको अन्त्य र बहुदलीय व्यवस्थाको स्थापना, १० वर्षे सशस्त्र युद्धलाई विराम लगाएर माओवादीलाई शान्तिपूर्ण राजनीतिमा ल्याउने काम, संविधान निर्माण र त्यसको कार्यान्वयन गर्ने लगायतका काममा समेत नेपाली कांग्रेसले सबैलाई जोडेर अगाडि बढ्न सकेको भन्दै अहिलेको विषम परिस्थितिमा पनि सबैलाई जोड्ने काम नेपाली कांग्रेसले मात्र गर्न सक्ने जिकिर गरे।
पार्टीको विशेष महाधिवेशनपछि पहिलो पटक रूपन्देही आएका शर्माले विशेष महाधिवेशनको विषयमा नअलमलिन नेता कार्यकर्ताहरूलाई आग्रह गरे।
‘अझै पनि चोक, चौतारा र चिया पसलहरूमा विशेष महाधिवेशनका विषयमा चर्चा गरेको सुनिन्छ, अब त्यसमा अलमलिने होइन। जाँगर हुनेहरूले अब फागुन २१ गतेपछि छलफल गरे हुन्छ निर्वाचनको समयमा अनावश्यक काममा अलमलिएर समय खेर फाल्ने छुट कसैलाई छैन,’ उनले भने।
शर्माले विशेष महाधिवेशन लगत्तै निर्वाचनमा केन्द्रित हुनुपरेको भए पनि नेपाली कांग्रेसले आफूलाई सुधार गर्दै अगाडि बढेको सन्देश दिन सकेको बताए।
‘विशेष महाधिवेशन लगत्तै उम्मेदवार चयन हुँदै गर्दा सबैको चित्त नबुझेको हुन सक्छ तर, हामीले १६५ क्षेत्रमध्ये दुई तिहाइ क्षेत्रमा नयाँ उम्मेदवार बनाएका छौँ, महिलाहरू दोब्बर हुनुहुन्छ,’ शर्माले भने।
यस पटकको निर्वाचनमा नेपाली कांग्रेस मात्रैले १६५ वटै क्षेत्रमा उम्मेदवार बनाउन सकेको भन्दै अब एक पटक समानुपातिक उम्मेदवार बनेको व्यक्ति अर्को पटक बन्न नपाउने परिपाटी स्थापित गर्ने तयारीमा रहेको बताए।
‘कसैलाई जीवनभर पद दिइरहने तर, कसैले जीवनभर राजनीतिमा लागेर पनि वडा सदस्य समेत बन्न नपाउने अवस्थालाई अब हामीले अन्त्य गर्दैछौं,’ उनले भने।
उनले प्रदेश र स्थानीय तहका उम्मेदवारहरू चयन गर्ने अधिकार पनि सो क्षेत्रका नेता कार्यकर्तालाई दिइने बताए।
‘अब स्थानीय र प्रदेशको उम्मेदवार बन्न काठमाण्डौं फर्किनुपर्ने छैन, जुन तहको उम्मेदवार हो त्यही तहबाट भोटिङ गरेर निर्वाचित हुनुपर्ने छ। वडा अध्यक्ष, पालिका प्रमुख, प्रदेश सांसद को के बन्ने हो त्यही तहका कार्यकर्ताको मन जित्ने गरी लाग्नुस्,’ शर्माले भने।
शर्माले नेपाली कांग्रेस आसन, भाषण, शासन, रासन सबैमा सुधार परिमार्जन गर्ने दिशामा अगाडि बढिरहेको बताए।
‘सत्ताको आसनमा जो पुगे पनि एक पटक मात्र हुने छन्, नेपाली कांग्रेसबाट कोही राष्ट्रपति भए पनि त्यो एक पटकको लागि मात्र हुनेछ। निर्वाचनको समयमा गर्ने सार्वजनिक कार्यक्रम सभा सम्मेलनमा मुख्य वक्ता र उम्मेदवारलाई बाहेक आसन ग्रहण गराउने छैनौँ। थोरै वक्ताको बीचमा पनि जे गर्न सकिन्छ त्यही मात्र बोल्ने छौँ, चुनाव जित्नैका लागि लहडका आधारमा कुनै पनि भाषण र आश्वासन दिने छैन,’ उनले भने।
शर्माले उम्मेदवारहरूलाई पनि पूरा गर्न नसक्ने कुराहरूको आश्वासन दिएर मत नमाग्न आग्रह गरे।
-1746009348.jpg)
