जनता समाजवादी पार्टी (जसपा) नेपालले आगामी फागुन २१ गते हुने प्रतिनिधि सभा निर्वाचनका लागि घोषणापत्र सार्वजनिक गरेको छ।
काठमाडौंको अनामनगरस्थित युनियन हाउसमा पत्रकार सम्मेलन गरी जसपा नेपालले घोषणा पत्र सार्वजनिक गरेको हो।
जसपाले यसपालि २५ पृष्ठको घोषणापत्र ल्याएको छ।
यसमा संविधान संशोधन गर्न आयोग गठन गर्नेदेखि भ्रष्टाचार नियन्त्रण र छानबिनका लागि जनलोकपाल बनाउनेसम्मका प्रतिबद्धता समेटिएका छन्।
जसपाले सबै नागरिकलाई निःशुल्क स्वास्थ्य सेवा प्रदान गर्ने प्रतिबद्धता व्यक्त गरेको छ।
साथै हरेक प्रदेशमा कम्तिमा एउटा अत्याधुनिक बहुविशिष्टिकृत सेवाप्रदायक अस्पताल र एउटा स्वास्थ्य विज्ञान प्रतिष्ठानका साथै हरेक स्थानीय तहमा एउटा सुविधासम्पन्न अस्पताल स्थापना गर्ने घोषणा गरेको छ।
शिक्षातर्फ जसपाले शिक्षाको पूर्ण सार्वजनिकीकरण गर्दै स्कुल, कलेज र विश्वविद्यालयहरू सार्वजनिक प्रणालीअन्तर्गत सञ्चालन गर्ने प्रतिबद्धता व्यक्त गरेको छ।
साथै शिशु कक्षादेखि उच्च तहसम्म निःशुल्क शिक्षालाई सुनिश्चित गर्ने घोषणा पनि जसपाले गरेको छ।
जसपाले प्रत्येक प्रदेशमा कृत्रिम बौद्धिकता (आर्टिफिसियल इन्टेलिजेन्स)मा आधारित आधुनिक प्रविधियुक्त अध्ययन तथा अनुसन्धान केन्द्रको स्थापना गर्ने घोषणा पनि गरेको छ।
न्यायको क्षेत्रमा जसपाले सबै नागरिकका लागि निःशुल्क कानुनी सहायताको व्यवस्था प्रदान गर्ने प्रतिबद्धता व्यक्त गरेको छ।
साथै प्रहरी ऐन संशोधन गरी व्यवसायिक, जनमत्री, उत्तरदायी र अधिकार सम्पन्न सुरक्षा व्यवस्था स्थापित गर्ने उसको प्रतिबद्धता छ। संघीय निजामती ऐन ६ महिनाभित्र पारित गराउने प्रयास गरिने पनि जसपाको प्रतिबद्धता छ।
जसपाले २०४७ सालयता निर्वाचित जनप्रतिनिधिहरू, प्रधानमन्त्री लगायत मन्त्रीहरू, उच्च पदस्थ कर्मचारी, सुरक्षा निकायका उच्च पदस्थ पदाधिकारी र संवैधिनक आयोगमा रहेका पदाधिकारीहरूको सम्पत्ति छानबिन गर्ने घोषणा पनि गरेको छ।
जसपाले वैदेशिक रोजगारमा जाने श्रमिकहरूका लागि फ्रि भिसा र फ्रि टिकट प्रदान गर्ने नीति लागू गर्ने जनाएको छ। वैदेशिक रोजगारीबाट फर्केकाहरूलाई सीपका आधारमा स्वदेशमै रोजगारीको प्रबन्ध गरिने नीति लिने जसपाको प्रतिबद्धता छ।
पूर्णपाठः
-1746009348.jpg)
