राष्ट्रिय स्वतन्त्र पार्टी (रास्वपा) का सांसद विपिन आचार्यले स्कुलदेखि मिडिया, रेस्टुरेन्टदेखि बैंकसम्म आज श्रमको मूल्य होइन, श्रमिकको बाध्यता नापिन थालेको भन्दै चिन्ता व्यक्त गरेका छन्।
बिहीबार प्रतिनिधिसभा बैठकमा शून्य समयमा बोल्दै देशभरका निजी क्षेत्रमा कार्यरत धेरैजसो श्रमिकको समान पीडा रहेको बताएका हुन्।
उनीहरूले काम गर्दा कर्मचारी, पारिश्रमिक माग्दा भिखारीजस्तो व्यवहार सहनुपरेको बताएका हुन्।
'देशभरका निजी क्षेत्रमा कार्यरत धेरैजसो श्रमिकको आज एउटै पीडा छ— काम गर्दा कर्मचारी, पारिश्रमिक माग्दा भिखारी!' उनले भने।
एक त थोरै पारिश्रमिक, त्यो पनि महिनौंसम्म नपाउने अवस्था र बिना ज्याला दैनिक दुई–चार घण्टा ओभरटाइम गराइनु आज सामान्य प्रवृत्ति बनेको उनले बताए।
'रोजगारदाताको व्यवहार चाहिँ काम गर्न दिएकै छु, फेरि पैसा पनि दिनुपर्छ र? भने जस्तो छ। इन्टर्नसिपका नाममा हुने सस्तो श्रम शोषण अर्को विकृतिका रूपमा उदाएको छ,' उनले भने।
त्यसैले महिनाको अन्त्यसँगै अनिवार्य तलब भुक्तानी, ओभरटाइमको स्पष्ट हिसाब, इन्टर्नलाई मर्यादित व्यवहार र तलब ढिला गर्दा ब्याजसहित दिनुपर्ने कडा कानुनी व्यवस्था र अनुगमन संयन्त्रको जोडदार माग गर्न उनले आग्रह गरेका छन्।
'श्रमको सम्मान नगर्ने अर्थतन्त्र कहिल्यै दिगो हुँदैन,' उनले भने।
