नेकपा कम्युनिस्ट पार्टी (नेकपा) का नेता नारायणकाजी श्रेष्ठले विगतमा कम्युनिस्ट एकता सफल नभएको भन्दै फेरि एकताको प्रयास नगर्ने निष्कर्षमा पुग्न नहुने बताएका छन्।
बिहीबार ४८ औँ पुष्पलाल स्मृति दिवसका अवसरमा नेकपा एमालेको राजधानी प्रदेश कमिटीले आयोजना गरेको ‘संविधानको रक्षा, लोकतन्त्रको सुदृढीकरणमा संविधान निर्माता प्रमुख दलहरूको भूमिका र दायित्व’ विषयक कार्यक्रममा बोल्दै श्रेष्ठले कम्युनिस्ट आन्दोलनलाई पुनर्गठन र रूपान्तरण गर्दै अन्ततः एउटै केन्द्र निर्माण गर्नुपर्ने धारणा राखे।
उनले वाम एकताको चर्चा गर्दा ‘प्रतिक्रियावादी शक्ति’ ले दबाब र योजना बनाउने भएकाले त्यसबाट डराएर पछि हट्न नहुने बताए।
‘हामी एक भयौँ भने प्रतिक्रियावादीले दमन गर्छन्, योजना बनाउँछन् भनेर वामपन्थी एकताको एजेन्डा छाड्न मिल्दैन। त्यसो भए कम्युनिस्ट नै नभनौँ, वामपन्थी नै नभनौँ भन्ने हो त ?’ श्रेष्ठले भने।
यसअघि भएको कम्युनिस्ट एकता असफल भएको अनुभवबाट शिक्षा लिनुपर्ने भए पनि त्यसकै आधारमा भविष्यका सबै प्रयास असफल हुन्छन् भन्ने निष्कर्ष गलत हुने उनको भनाइ थियो।
‘एकचोटि सफल भएन भन्दैमा सधैं असफल भइरहने भन्ने हुँदैन। त्यसबाट शिक्षा लिएर एकताको वस्तुगत आधार तयार गर्दै अघि बढ्नुपर्छ,’ उनले भने।
उनले अहिले केही नेतामा पार्टी एकता भएपछि आफ्नो भूमिका र हैसियत गुम्ने चिन्ता पनि रहेको संकेत गरे। तर व्यक्तिगत स्वार्थभन्दा देश, लोकतन्त्र र कम्युनिस्ट आन्दोलनको भविष्यलाई केन्द्रमा राख्नुपर्ने उनको भनाइ थियो।
‘हामी कहाँ पर्छौं भनेर होइन, देश बचाउने, लोकतन्त्र बचाउने र वामपन्थी आन्दोलनलाई अघि बढाउने विषयलाई प्राथमिकतामा राख्नुपर्छ,’ उनले भने।
श्रेष्ठले तत्काल पार्टी एकताको अवस्था तयार भइनसकेको उल्लेख गर्दै त्यसलाई दीर्घकालीन लक्ष्यका रूपमा राखेर सहकार्य विस्तार गर्नुपर्ने बताए।
सबै वामपन्थी दलले पहिले आफ्नो रूपान्तरण र पुनर्गठनको प्रक्रिया पूरा गर्नुपर्ने र एउटै कम्युनिस्ट केन्द्र बनाउने कुरालाई मूल लक्ष्य बनाउनु पर्ने उनको भनाइ थियो।
संविधान, लोकतन्त्र र राष्ट्रिय स्वाधीनताको पक्षमा उभिएका देशभक्त तथा वामपन्थी शक्तिबीच सहकार्यलाई संस्थागत गर्नुपर्ने पनि उनको भनाइ थियो।
‘मैले अहिले तुरून्तै पार्टी एकता गरिहाल्ने परिस्थिति बनेको छ भनेको होइन। तर त्यसलाई केन्द्रमा नराखी हुँदैन। सहकार्य बढाऔं, सबै पार्टीले रूपान्तरण र पुनर्गठन गरून् र त्यसपछि एउटै केन्द्र बनाउने दिशामा अघि बढौँ,’ उनले भने।
श्रेष्ठले भविष्यको एकीकृत कम्युनिस्ट केन्द्रले मार्क्सवाद, समाजवाद र वामपन्थी राजनीतिक दिशा नत्याग्ने बरू बदलिएको समयअनुसार विचार, कार्यशैली र संगठनात्मक संरचनालाई थप विकसित र सिर्जनशील बनाउने दाबी गरे।
बबरमहलस्थित कार्की ब्याक्वेटमा जारी कार्यक्रमलाई अहिले एमाले अध्यक्ष केपी शर्मा ओलीले सम्बोधन गरिरहेका छन्।
