भारतको एक भवनमा आगलागी हुँदा २० जना विद्यार्थीको मृत्यु भएको छ।
देशको पश्चिमी भेग सुरतको तक्षशीला भवनको तेस्रो र चौथो तलामा रहेको ट्युसन सेन्टरमा आगलागी हुँदा कक्षाकोठामा पढिरहेका कम्तिमा २० जना विद्यार्थीहरुको मृत्यु भएको हो। घटनामा परी २० जनाभन्दा बढी विद्यार्थी घाइते छन्।
शुक्रबार भएको आगलागीमा घाइते विद्यार्थीको गुजरातका अस्पतालमा उपचार भइरहेको समाचार संस्था रोएटर्सले उल्लेख गरेको छ। आगलागीमा परेर २० वर्षभन्दा मुनिका विद्यार्थीहरु धेरै मरेका छन्।
विद्यालय भवनमा कसरी आगो लाग्यो भन्ने खुलेको छैन। तर आगो भर्याङमा पनि सल्केकोले विद्यार्थीहरु भवनबाट बाहिर निस्कन सकेका थिएनन्।
विद्यालय भवनको छाना ज्वलनशील बस्तु भएकोले आगो छिटो फैलिँदा धेरै जनधनको क्षति भएको अनुमान गरिएको छ। गुजरातका मुख्यमन्त्री विजय रुपाणीले घाइतेको उपचार गर्न र विद्यालयमा आगो लाग्नुको कारण खोजी गर्न निर्देशन दिएका छन्। साथै मृतक विद्यार्थीका परिवारलाई चार लाख राहत दिने घोषणा गरिसकेका छन्।
प्रधानमन्त्री नरेन्द्र मोदीले ट्वीट गर्दै घटनाका प्रभावितलाई सक्दो सहयोग गर्न गुजरात सरकार र स्थानीय प्रशासनलाई निर्देशन दिएका छन्।
