ललितपुरको गोदावरीमा अन्डरग्राउन्ड पार्टीको आयोजना गरी लागुऔषधको कारोबार गरेको खुलेको छ।
लागुऔषध नियन्त्रण ब्युरोले ६ जना भारतीय नागरिक र तीन जना नेपालीलाई पक्राउ गरेको एसपी जनकबहादुर शाहीले जानकारी दिए।
गोदावरीको विशंखुनारायणमा रहेको एक रिसोर्टमा महामाया मन्त्र इभेन्टको नाम राखेर अन्डरग्राउन्ड पार्टी गरिएको थियो। उक्त पार्टी ७२ घण्टासम्म निरन्तर सञ्चालन गर्ने भनिएको थियो।
अंग्रेजी नयाँ वर्षलाई लक्षित उक्त कार्यक्रममा लागुऔषधको कारोबार भइरहेको सूचना ब्युरोको टोलीले पाएको थियो। सोही सूचनाको आधारमा उनीहरूलाई बुधबार ब्युरोले पक्राउ गरेको हो।
त्यसक्रममा प्रहरीले एलएसडी ६ पिस, गाँजा २२.२४० ग्राम, ६१ ग्राम चरेस, एमडिएमए एक पिस र म्याजिक मशरूम चार ग्राम बरामद गरेको हो।
भारतका केभिन जोसेफ, अभिराज कुथाडी, डिमिट्रियोस् कट्टोस्, सदिक, अस्विन अन्तु र वैशनभ के शाजु पक्राउ परेका हुन्।
त्यस्तै चितवनका ३० वर्षीय पुष्पराज परियार, मोरङका २५ वर्षीय मनसुन न्यौपाने र ४० वर्षीय आदित्य अर्याल पक्राउ परेका छन्।
उनीहरूमाथि लागुऔषध नियन्त्रण ऐन २०३३ अनुसार काठमाडौं जिल्ला अदालतबाट म्याद थपेर अनुसन्धान अघि बढाएको छ।
-1746009348.jpg)
