भक्तपुरको कौशलटारमा ट्राफिक प्रहरीको कार्यालय छ।
यसको दुई सय मिटरछेउमा सामान्य खालको बस स्ट्याण्ड छ। सोही स्ट्याण्डबाट बालकोट हुँदै बिरुवासम्मको गन्तव्यका लागि यात्रुवाहक बसहरू छुट्छन्।
मंगलबार साँझ बा४ख ७०८० नम्बरको यात्रुवाहक बस सो स्ट्याण्डमा यात्रु चढाउँदै थियो। बसका सहचालकले यति यात्रु चढाए कि भित्र यात्रु नै निसास्सिने किसिमको भीड भयो।
उनले त्यतिमै चित्त बुझाएनन् र भित्र नअटेका यात्रुलाई पछाडि झुन्डिन लगाए। गन्तव्यका लागि हतारो गरिरहेका यात्रु पनि तयार भइहाले र यस्तो दृश्य देखिन पुग्यो।
बालकोट प्रधानमन्त्री केपी ओलीको घर भएको ठाउँ हो। यही बाटोमा सडक सुरक्षा संयन्त्रको उपस्थिति भने खासै देखिँदैन। र, सडक नियमको चरम उल्लंघन हुन पुग्छ।
मंगलबार साँझ कौशलटारबाट बालकोटसम्म यो बस पुग्दा सडकको सुरक्षा संयन्त्र थिएन र बस अनवरत ट्राफिक नियम उल्लंघन गर्दै गुडिरह्यो।
यो रूटमा क्षमताभन्दा बढी यात्रु त दैनिकी नै बन्दै आएको छ।
शब्द/तस्बिर: खिलानाथ ढकाल