बूढानीलकण्ठ नगरपालिकास्थित एकता बस्तीमा चोरी तथा लुटपाट गर्ने पाँच जनालाई प्रहरीले पक्राउ गरेको छ।
बुधबार र बिहीबार महानगरीय प्रहरी बृत्त महाराजगन्जले उनीहरुलाई पक्राउ गरेको हो।
प्रहरीका अनुसार गत असोज १५ गते उनीहरुले बुढानिलकण्ठको एकता बस्तिस्थित सन्तोष रिमालले संचालन गरेको दुप्चेशर मोबाइल÷टिभी मर्मत तथा बिक्री केन्द्रमा रातको समयमा सटर फोरेर चोरी तथा डकैती गरेका थिए।
पक्राउ पर्नेमा ताप्लेजुङका २० वर्षीय योगेन्द्र मगर, उदयपुरका १६ वर्षीय योजिस राई, सिन्धुपाल्चोकका १६ वर्षीय अमृत गुरुङ, रामेछापका १५ वर्षीय बिशाल तामाङ र काभ्रेपलान्चोकका १५ वर्षीय बिश्राम तामाङ रहेको महानगरीय प्रहरी बृत्त महाराजगन्जका प्रमुख डिएसपी उमेश लम्सालले जानकारी दिए।
उनीहरुको साथबाट चोरिएको १० थान विभिन्न ब्राण्डका मोबाइल, तिनमा प्रयोग भएको सिम ३ थान र डिजिटल घडी बरामद भएको छ।
पक्राउ परेकाले अन्त पनि चोरी गरेको हुन सक्ने भन्दै उनले थप अनुसन्धान भइरहेको बताए।