दुबईको आबुधाबीस्थित अलराना सडकमा कामदार बोकेको बस दुर्घटनामा मृत्यु हुने तीन नेपाली महिला रहेका छन्।
बिहीबार अलरानाबाट दुबई जाँदै गरेको बस दुर्घटना हुँदा ६ जनाको मृत्यु भएको थियो जसमा तीन जना नेपाली रहेको पुष्टि भएको छ।
यसअघि मृत्यु हुनेमा एक जना नेपालीको मात्रै पहिचान हुन सकेको थियो। मृत्यु हुनेमा ६ जनामध्ये पाँच जना महिला रहेका थिए भने एक पुरूष रहेको गल्फ न्युजले जनाएको छ।
लरीसँग ठोक्किएको बसमा २४ जना महिला सवार थिए जसमध्ये १७ जना नेपाली रहको आबुधाबीस्थित नेपाली दूतावासका विशेष कार्कीले बताएका थिए।
दुर्घटनामा परी झापाकी ४४ वर्षीया कृष्ण कुमारी अधिकारी, प्युठानकी २४ वर्षीया भावना कुँवर र बाराकी अमिसा मोक्तान तामाङले ज्यान गुमाएका हुन्।
पाकिस्तानी चालक र श्रीलंकाका एक महिलाले पनि ज्यान गुमाएका थिए भने एक जनाको पहिचान हुन सकेको छैन।
दूतावासका अनुसार उनीहरू एक प्राइभेट फर्ममा सरसफाइका कामदार थिए।