कोरोना संक्रमण रोकथाम र नियन्त्रणको काम प्रभावकारी बनाउन मन्त्रिपरिषदले गठन गरेको कोरोना क्राइसिस म्यानेजमेन्ट टिम (सिसिएमसी) को कार्यालय नेपाली सेनाको छाउनीस्थित ब्यारेकमा रहने भएको छ। मंगलबार सिमएमसीको पहिलो बैठक पनि बसेको छ।
बैठकमा अहिलेसम्म भइरहेका कामको समीक्षा भएको थियो भने कर्मचारी प्रशासन र सुरक्षा निकायले कसरी समन्वय गरेर अगाडि बढ्ने भन्नेबारे छलफल भएको एक मन्त्रीले बताए।
'आज पहिलो बैठक भएकाले अहिलेसम्म भएका कामहरुको ब्रिफिङ मात्रै लिइएको हो। स्वास्थ्य समाग्रीहरु कसरी वितरण गर्ने र त्यसमा कुन निकायले कस्तो भूमिका खेल्न सक्छ भनेर कुराकानी भयो', उद्योग वाणिज्य तथा आपूर्ति मन्त्री तथा टिमका सदस्य लेखराज भट्टले सेतोपाटीसँग भने, 'अहिलेसम्म सेनाले गरेको तयारीबारे समेत ब्रिफिङ भयो। अहिलेसम्को काम सन्तोषजनक रहेको हाम्रो निश्कर्ष छ। आगामी योजनाबारे फेरि छलफल हुन्छ।'
आइतबार बसेको मन्त्रिपरिषदको बैठकले उपप्रधानमन्त्री एवम् रक्षामन्त्री ईश्वर पोखरेलको संयोजकत्वमा सिसिएमसी गठन गरेको थियो। यो टिममा गृहमन्त्री रामबहादुर थापा, स्वास्थ्य मन्त्री भानुभक्त ढकाल, उद्योग वाणिज्य तथा आपुर्ति मन्त्री लेखराज भट्ट, अर्थमन्त्री युवराज खतिवडा र संघीय मामिला तथा सामान्य प्रशासन मन्त्री हृदयेश त्रिपाठी सदस्य छन्।
बैठकले स्वास्थ्य मन्त्रालयका प्रवक्ता विकास देवकोटालाई प्रवक्ता तोकेको छ भने नेपाली सेनाका प्रवक्ता विज्ञानदेब पाण्डेलाई सह प्रवक्ता तोकेको छ।
