पहिरो प्रभावितका लागि राहत सामग्री लिएर नेपाली सेनाको हेलिकप्टर बझाङ पुगेको छ।
संघ र प्रदेश सरकारले पठाएको खाद्यान्न र लत्ताकपडा लगायतका सामग्री लिएर सेनाको हेलिकप्टर सदरमुकाम चैनपुर पुगेको प्रमुख जिल्ला अधिकारी कमलराज भण्डारीले बताए।
‘घटनास्थलमा हेलिकप्टर ल्याण्ड गर्न नसकिने भएपछि चैनपुर पुगेको हो,’ उनले भने।
चैनपुरबाट सामान गाडीमार्फत् प्रभावित क्षेत्रमा लगिने उनले बताए।
बझाङमा पहिरोमा पुरिएका ७ मध्ये ६ जनाको शव फेला परेको छ।
केदारस्युँ गाउँपालिकाको वडा नम्बर ८ मल्लेसीमा गएराति १ बजेतिर पहिरो जाँदा ७ जना पुरिएका थिए।
मृत भेटिनेमा वर्ष ५० की राममति जेठारा, अन्दाजी वर्ष १० की अस्मिता जेठारा, ७ वर्षका प्रयाग जेठारा, १५ वर्षीय शान्ति जेठारा, १४ वर्षीय सन्तु जेठारा र ४६ वर्षीय रामकला रहेका जिल्ला प्रहरी कार्यालय बझाङका सूचना अधिकारी प्रहरी निरीक्षक लोकेन्द्र सिंहले बताए ।