कोरोनाभाइरसबाट सबभन्दा बढी प्रभावित दोस्रो मुलुक भारतमा ७८ प्रतिशत बिरामीले आइसियू बेडमा भर्ना पाउन नातागोता र भनसुनको भर पर्नु परिरहेको तथ्य बाहिर आएको छ।
लोकल सर्कल्स संस्थाले गरेको सर्वेक्षणबाट यस्तो तथ्य बाहिर आएको द प्रिन्टले जनाएको छ। उक्त सर्वेक्षणमा सहभागी भएकाहरूमध्ये ९२ प्रतिशतले तत्काल कति आइसियू बेड उपलब्ध छन् भन्ने अस्पतालको वेबसाइट र प्रवेशद्वारमै अनिवार्य रूपमा राख्नु पर्ने बताएका छन्।
भारतका २ सय ११ जिल्लाबाट १५ हजार मानिसले उक्त सर्वेक्षणमा भाग लिएका थिए। त्यसमध्ये पुरूष ६५ र महिला ३५ प्रतिशत थिए।
सहभागीहरूलाई आइसियूमा भर्ना गर्नुपर्दाको अनुभव र आइसियू बेडको उपलब्धता वेबसाइट र ढोकामा अनिवार्य राख्नुपर्छ कि पर्दैन भनेर दुई प्रश्न सोधिएको थियो।
लोकल सर्कल्सका प्रबन्धक अक्षय गुप्ताले १७ हजार जवाफ आएको बताए। १५ हजार सहभागीमध्ये २ हजारले दुबै प्रश्नको उत्तर दिएका थिए।
भारतमा अहिलेसम्म ५४ लाखभन्दा बढी मानिसमा कोरोना संक्रमण भएको छ।
सर्वेक्षणमा सहभागी ४ प्रतिशतले मात्र नियमित प्रक्रियाबाट आइसियू बेडमा भर्ना पाएको बताएका छन्।
७ प्रतिशतले धाउँदाधाउँदा हैरान भएपछि मात्र आइसियूमा भर्ना पाएको जवाफ दिएका छन् भने ७ प्रतिशतले अस्पताल वा सरकारी अधिकारीलाई घुस दिएपछिमात्र आइसियू बेड पाएको बताएका छन्।
४ प्रतिशतले आफूहरूले जति गर्दा पनि आइसियूमा भर्ना नपाएको बताएका छन्।