ललितपुरमा नक्कली पैसा दिएर सुन किन्ने दुई जना पक्राउ परेका छन्।
बिहीबार राति काठमाडौं महानगरपालिका-२१ टेकू घर भई भक्तपुरको सल्लाघारी बस्ने इक्युज तुलाधर र वडा नम्बर २७ ज्याठा असन बस्ने अजय महर्जनलाई प्रहरीले पक्राउ गरेको महानगरीय प्रहरी परिसरका एसएसपी टेकप्रसाद राईले जानकारी दिए।
उनीहरू असोज १ गते ताल्छिखेलको जय माँ दुर्गा ज्वेलर्समा सुन किन्नको लागि ग्राहक बनेर गएका थिए। प्रहरीका अनुसार सुन हेरेपछि उनीहरूले ज्वेलर्सका सञ्चालक डम्बर बहादुरलाई बिल बनाउन भनेका थिए। डम्बर बहादुरले बिल बनाउँदै गर्दा उनीहरूले ‘एकछिन है दाइ’ भनी फोनमा कुरा गरेको नाटक गर्दै सुन लिएर फरार भएका थिए।
उनीहरूले पाँच तोला सुनको तिलौरी र औंठी लिएर चार लाख ७० हजार रुपैयाँ पसलमा छाडेर भागेका प्रहरीले जनाएको छ।जसमध्ये पाँच हजार मात्रै सक्कली परेको थियो।
ज्वेलर्सका सञ्चालकले ती नोट नक्कली परेको कुरा पछिमात्रै थाहा पाएका थिए।
प्रहरीले उनीहरूबाट एक थान सुनको रानिहार, एक थान तिलहरी, सुनको औंठी बरामद गरेको छ।
त्यस्तै, प्रिन्ट मेसिन, ल्यापटप, सिपियू, एक हजारको नक्कली ४ सय ६५ थान र सक्कली ३७ थान बरामद गरको छ।
उनीहरूमाथि जिल्ला अदालतबाट सात दिनको म्याद थप गरी अनुसन्धान अघि बढाएको छ।
