भेरी नदीमा बगेर बेपत्ता भएकी रुकुम पश्चिमकी १६ वर्षीया दीपा डाँगीको अवस्था २४ घन्टा बित्दा पनि अज्ञात छ।
बुधबार बिहानैदेखि उनको खोजीको लागि जाजरकोट, रुकुम पश्चिम र सल्यान जिल्लाका नदी सिमाना क्षेत्रका प्रहरी परिचालन भएका छन्।
जाजरकोट जिल्लाको कुदु प्रहरी चौकी, मटेला प्रहरी चौकी र छेडागाड प्रहरी चौकीबाट ३-३ जना गरी ९ जना पौडीबाज प्रहरीहरू बेपत्ता डाँगीको खोजीमा खटाएको जाजरकोट प्रहरी प्रमुख डिएसपी मधुकुमार थापाले बताए।
‘प्रहरीले मंगलबार पनि दिउँसोदेखि बेलुका आँखा देखिदासम्म खोजी गरेको थियो,’ थापाले भने, ‘बुधबार बिहानैदेखि बेत्तपा दीपाको खोजीमा ९ जना प्रहरी खटाएको छु, तर अहिलेसम्म फेला पार्न सकिएको छैन।’
त्यसका साथै आ–आफ्नो सिमाना क्षेत्रमा रुकुम पश्चिम प्रहरी र सल्यान जिल्लाको प्रहरी पनि दीपाको खोजीमा खटिएको डिएसपी थापाले जानकारी दिए।
‘हामीले नदीमा माछा मार्ने व्यक्ति स्थानीय र सर्वसाधारणलाई पनि दीपाबारे सोधिखोजी गरिरहेका छौं,’ उनले भने, ‘अहिलेसम्म पौडिन सक्ने प्रहरीहरू मात्रै खटाइएको थियो। अब गाडीका ट्युबहरू पनि प्रयोग गरी खोजी थाल्ने कि भन्ने सल्लाह भइरहेको छ।’
डिएसपी थापाले जाजरकोटमा आफूहरूसँग कुनै रबरबोट वा नदीभित्र प्रवेश गरी खोज्ने साधन नभएको बताए।
मंगलबार बिहान साढे ११ बजेतिर भेरी नदीमा रूकुम पश्चिमको चौरजहारी नगरपालिका वडा नं. १२ दुरनेटाकी दीपा बगेकी थिइन्।
नदीमा बगेकामध्ये दीपाकी बहिनी ११ वर्षीया बहिनी गीता र १७ वर्षीय दाजु रामबहादुर डाँगीलाई स्थानीयले उद्धार गरी जिल्ला अस्पताल जाजरकोट पुर्याएका थिए। गीताको भने मृत्यु भइसकेको थियो।