आइसिसी पुरुष टी-२० विश्वकप २०२६ को समूह चरणका खेलहरू सकिएसँगै अब उपाधि भिडन्तका लागि उत्कृष्ट आठ टोली (सुपर-८) बीच प्रतिस्पर्धा सुरु भएको छ भने सबै टोलीले आफ्नो पहिलो खेल खेलिसकेका छन्।
यी आठ टोलीलाई दुई समूहमा विभाजन गरिएको छ। प्रत्येक समूहबाट शीर्ष दुई टोली मात्र सेमिफाइनलमा प्रवेश गर्नेछन्। समूह १ मा भारत, दक्षिण अफ्रिका, वेस्ट इन्डिज र जिम्बाब्वे रहेका छन् भने समूह २ मा इङ्ल्यान्ड, न्युजिल्यान्ड, श्रीलंका र पाकिस्तान रहेका छन्।
अहिलेसम्मको अवस्था यस्तो छ :
समूह १
१. वेस्ट इन्डिज: २ अंक (नेट रन रेट: +५.३५०)
तेस्रो पटक टी-२० विश्वकप जित्ने लक्ष्यमा रहेको वेस्ट इन्डिजले जिम्बाब्वेलाई विशाल अन्तरले हराउँदै सेमिफाइनलको यात्रा बलियो बनाएको छ। सिम्रन हेटमायरले विष्फोटक ब्याटिङ गर्दै मात्र ३४ बलमा ८५ रन जोडेपछि वेस्ट इन्डिजले २० ओभरमा २५४ रनको पहाड खडा गरेको थियो।
जवाफमा जिम्बाब्वेले त्यो लक्ष्य भेट्टाउन सकेन। १०७ रनको यो फराकिलो जितले वेस्ट इन्डिजको 'नेट रन रेट' निकै राम्रो बनाएको छ। अब एक जितले नै उनीहरू सेमिफाइनल पुग्न सक्छन्।
२. दक्षिण अफ्रिका: २ अंक (नेट रन रेट: +३.८००)
दक्षिण अफ्रिकाले डिफेन्डिङ च्याम्पियन तथा आयोजक भारतलाई ७६ रनले हराउँदै सानदार सुरुवात गरेको छ। एक समय २० रनमा ३ विकेट गुमाएको दक्षिण अफ्रिकालाई डेभिड मिलर (६३) र डेवाल्ड ब्रेभिस (४५) को ९७ रनको साझेदारीले १८८ रनको लक्ष्यसम्म पुर्यायो।
त्यसपछि दक्षिण अफ्रिकी बलरहरूले सानदार बलिङ गर्दै भारतको बलियो ब्याटिङ लाइनअपलाई १८.५ ओभरमा ध्वस्त पारे। यो जितले उनीहरूलाई बलियो दावेदारको रूपमा उभ्याएको छ।
३. भारत: ० अंक (नेट रन रेट: -३.८००)
टी-२० विश्वकपमा लगातार १३ खेल जितेको भारतको अपराजित यात्रा दक्षिण अफ्रिकासँगको हारसँगै टुङ्गिएको छ। भारतको माथिल्लो क्रमका ब्याटरहरू नचल्नु अहिलेको मुख्य समस्या बनेको छ। दक्षिण अफ्रिका विरुद्ध शिवम दुबेले ४२ रन बनाए पनि त्यो पर्याप्त भएन।
भारतले पछिल्ला तीन खेलमा (पाकिस्तान, नेदरल्याण्ड र दक्षिण अफ्रिका विरुद्ध) पहिलो ओभरमै विकेट गुमाएको छ। यद्यपि, जसप्रित बुमराह र अर्शदीप सिंहले बलिङमा गरेको राम्रो सुरुवात भारतका लागि सकारात्मक पक्ष हो। अब सेमिफाइनल पुग्न भारतले वेस्ट इन्डिज र जिम्बाब्वेलाई अनिवार्य हराउनुपर्नेछ।
४. जिम्बाब्वे: ० अंक (नेट रन रेट: -५.३५०)
वेस्ट इन्डिजसँगको ठूलो हारले जिम्बाब्वेको सेमिफाइनल पुग्ने सपनामा धक्का लागेको छ। उनीहरूको रन रेट पनि निकै कमजोर भएको छ। अब अगाडि बढ्न जिम्बाब्वेले भारत र दक्षिण अफ्रिका दुवैलाई फराकिलो अन्तरले हराउनुपर्ने चुनौतीपूर्ण अवस्था छ। तर, विश्वका दिग्गज टोलीहरूसँग प्रतिस्पर्धा गरेर जिम्बाब्वेले आफूलाई प्रमाणित भने गरिसकेको छ।
समूह २
१. इङ्ल्यान्ड: २ अंक (नेट रन रेट: +२.५५०)
समूह चरणमा केही कठिन मोडहरू पार गर्दै इङ्ल्यान्ड अहिले लयमा फर्किएको छ। उसले श्रीलंकालाई ५१ रनले हराउँदै सुपर-८ मा सुखद सुरुवात गरेको छ। सुरुमा श्रीलंकाली स्पिनरहरूले दबाब दिएर इङ्ल्यान्डलाई १४६ रनमा रोकेका थिए (फिल साल्टले ६२ रन बनाए)। तर, श्रीलंकाले राम्रो ब्याटिङ गर्न सकेन र ९५ रनमै अलआउट भयो।
इङ्ल्यान्डका विल ज्याक्सले ब्याटिङसँगै बलिङमा पनि ३ विकेट लिएर उत्कृष्ट प्रदर्शन गरे। अब पाकिस्तान वा न्युजिल्यान्डमध्ये एक टोलीलाई हराए इङ्ल्यान्ड सेमिफाइनल पुग्नेछ।
२. पाकिस्तान: १ अंक
पाकिस्तान र न्युजिल्यान्ड बीचको खेल कोलम्बोमा वर्षाका कारण रद्द भएपछि दुवै टोलीले १–१ अंक बाँडेका छन्। पाकिस्तानले समूह चरणमा भारतसँग मात्र हार बेहोरेको थियो। अब सेमिफाइनलमा पुग्न दुवै खेल जित्नु पर्ने दबाबमा छ पाकिस्तान।
३. न्युजिल्यान्ड: १ अंक
न्युजिल्यान्डको पनि वर्षाले खेल रद्द भएपछि १ अंक भएको छ। न्युजिल्यान्डले समूह चरणमा दक्षिण अफ्रिकासँग मात्र हार बेहोरेको थियो। पहिलो खेलमा अंक गुमाएसँगै न्युजिल्यान्डका लागि सेमिफाइनलमा पुग्न बाँकी दुवै खेल जित्नुको विकल्प छैन।
४. श्रीलंका: ० अंक (नेट रन रेट: -२.५५०)
अघिल्लो हप्ता अस्ट्रेलियालाई हराएको श्रीलंकाले त्यसपछिको लय कायम राख्न सकेको छैन। जिम्बाब्वेसँगको हार र अहिले इङ्ल्यान्डसँगको ठूलो हारले उसलाई संकटमा पारेको छ। श्रीलंकाका स्पिनरहरूले राम्रो बलिङ गरे पनि ब्याटिङमा देखिएको अस्थिरता उसको मुख्य कमजोरी बनेको छ। अब सेमिफाइनलको दौडमा रहन श्रीलंकाले बाँकी दुवै खेल जित्नै पर्ने दबाब छ।
-1746009348.jpg)
