लगातार वर्षाका कारण नेपालका विभिन्न ठाउँमा आएको बाढी र पहिरोका कारण निकै जनधनको क्षति भएको छ। अझ सिन्धुपाल्चोकको मेलम्ची बजार निकै प्रभावित बन्यो।
सिन्धुपाल्चोकको मेलम्ची र इन्द्रावती नदीमा असार १ गते राति आएको बाढीले धेरै नै विनाश गरेको छ।
अहिलेसम्म मेलम्ची बजार आसपासका क्षेत्रमा भएको क्षतिको विवरण आइसकेको छैन। मेलम्चीभन्दा माथिल्लो क्षेत्र हेलम्बूमा त्योभन्दा धेरै क्षति पुगेको छ।
बाढी र हिलोले घरहरु पुरिनुका साथै खेतीपाती पनि समाप्त पारेको छ। जनधनको क्षति भएको छ। मेलम्ची बजार नै बगरमा परिणत भएको छ। जसकारण धेरै मानिसहरु घरविहीन भएका छन्।
हेलम्बुबाटै उर्लिंदै आएको मेलम्चीले आठ वटा ट्राउट माछा फर्म, नाकोते पुल, तिम्बु, चनौटे बजार, खेतीयोग्य जमिन, आमाह्योल्मो बसपार्क, सिटी पार्कलगायत बगर बनाएको छ।
बाढीका कारण ४० जनाभन्दा बढी बेपत्ता भएका छन्। आधा दर्जनबढीको ज्यान गइसकेको छ।
यस्तो बेलामा काठमाडौंबासी मेलम्ची पीडितका लागि मल्हम बनेर गइरहेका छन्। खाद्यन्य, लत्ताकपडा, भाडाकुडालगायतका सकेका सामग्री बोकेर दैनिक मेलम्ची जानेको लर्को छ। महानगरपालिकादेखि विभिन्न नगरपालिका र गाउँपालिकाले आर्थिक सहयोग गरिरहेका छन्।
यसैबीच ललितपुरको नक्खुस्थित प्रगतिशील टोल सुधार समितिले मेलम्चीमा पुगेर बाढी पीडित १४४ परिवारका लागि राहत वितरण गरेको छ। हरेक परिवारलाई कम्तिमा १५ दिन पुग्ने खाद्य सामाग्री र केही लत्ताकपडा बोकेर शनिबार मेलम्ची पुगेको समितिले मेलम्ची राहत विकास समितिका संयोजक राजेन्द्र दुलाललाई सहयोग हस्तारण गरेर फर्किएको छ।
काठमाडौंलाई पानीको प्यास मेटाएर आफू भने आँशुको भेलमा डुबिरहेको मेलम्चीको दुःख र पीडालाई टुलुटुलु हेरेर कहाँ बस्न सकिन्छ र? मेलम्चीको यो दर्दनाक अवस्थामा साथ र सहयोगको हात बढाउनु अहिलेको आवश्यकता ठानेर हामीले तत्काल राहत र उद्धारको व्यवस्थापनमा केही सहयोग गरेको समितिका संयोजक बाबुराम चौलागाईले जानकारी दिए।
‘अचानक आएको बाढीले पुर्याएको क्षतिबारे समाचार हेरेपछि आफूलाई रोक्नै सकेनौं। त्यही भएर वरिवरिका छिमेकी मिलेर मेलम्चीमा घरबारबिहीन भएका पीडितलाई सहयोग गर्न तम्सियौं’, चौलागाईले भने,‘धेरै समय पनि भएन। शुक्रबार टोलका साथीभाइबाट सहयोग उठाएर शनिबार सबेरै बुझाएर आयौं, थोरै भए पनि सहोग गर्न पाउँदा खुसी लागेको छ।’
आफूहरूले हरेक परिवारका लागि छुट्टा-छुट्टै पोका बनाएर लगेको राजन आचार्यले जानकारी दिए। नख्खुमै किराना पसल चलाउँदै आएका आचार्यले भने, ‘हाम्रो सहयोग वास्तविक पीडितको हातमा परेकोमा खुसी छौ।’
उनीहरूले मेलम्ची नगरपालिकाको समन्वयमा सहयोग सामाग्री हस्तान्तरण गरेका हुन्। समितिको तर्फबाट चम्लागाई र आचार्यसहित डुक्पा घले, प्रकाश महर्जन, ढाकाप्रसाद गौतम, दिनेश चौलागाईंको टोली दुई गाडी सामाग्रीसहित मेलम्ची पुगेको थियो।
काठमाडौंको एउटा सानो टोलका मानिसहरू एक भएर ल्याएको राहत बुझ्दै मेलम्ची राहत विकास समितिका संयोजक राजेन्द्र दुलालले सहयोगका लागि आभार व्यक्त गरेका थिए।
-1756794700.JPG)
-1746009348.jpg)
