सिन्धुपाल्चोकस्थित बाह्रबिसे प्रहरीको हिरासतमा रहेका व्यक्तिको मृत्यु भएपछि छानबिन हुने भएको छ।
प्रहरी हिरासतमा रहेका बाह्रबिसे नगरपालिका वडा नम्बर ७ का ३५ वर्षीय खड्गबहादुर तामाङको मृत्यु भएको थियो। प्रहरीले उनलाई कुटपिट गरेको भन्दै पीडित पक्षले आइतबार बाह्रबिसे बजारमा प्रदर्शन गरेका थिए। उनीहरूले घटनाको छानबिन गरी दोषीलाई कारबाही गर्न माग गरेका छन्।
प्रदर्शनपछि जिल्ला प्रशासन कार्यालय सिन्धुपाल्चोकले छानबिन समिति बनाउन लागेको जिल्ला प्रहरी कार्यालय प्रमुख प्रहरी उपरीक्षक राजन अधिकारीले जानकारी दिए।
'छानबिन गरिदिन भन्दै प्रदर्शन भएपछि समिति गठन हुने भएको छ। को-को रहन्छन् भन्ने खुलिसकेको छैन। हामी छलफलमा छौं,' प्रहरी उपरीक्षक अधिकारीले भने।
मृतक तामाङको शरिरमा चोटपटक देखिएको भन्दै उनको परिवारले कुटपिटबाटै मृत्यु भएको दाबी गरेका छन्।
तर प्रहरीले उनीमाथि कुटपिट नभएको बताएका छन्।
'उनीमाथि कुटपिट भएको छैन। प्रहरीले उनलाई कुटपिट गर्नु जरूरी नै थिएन। किनकी उनले आफैं चोरी गरेको स्वीकारिसकेका थिए,' अधिकारीले भने।
तामाङलाई गत शुक्रबार बिहान धुलिखेल अस्पताल लगिएको थियो। अस्पतालमा लग्दा चिकित्सकले उनलाई मृत घोषणा गरेका थिए।
प्रहरी नायब उपरीक्षक दक्ष बस्नेतका अनुसार तामाङलाई चोरीको मुद्दामा प्रहरीले गत १८ गते नियन्त्रणमा लिएको थियो।
उनीमाथि एक जनाको एक लाख, सहकारीमा फुटाएर ८१ हजार ७२५ रुपैयाँ चोरी गरेको आरोप थियो।
प्रहरीका अनुसार उनी सुरूकै दिन देखि बिरामी थिए।
'उहाँलाई पक्राउ गरेकै दिन देखि बिरामी हुनुभयो। पक्राउ गर्दा उहाँको नाकबाट रगत बगेको थियो। त्यो दिन स्वास्थ्य चौकीमै राख्यौं। त्यसपछि प्रत्येक दिन उहाँलाई अस्पताल लगिएको छ,' प्रहरी नायब उपरीक्षक बस्नेतले भने,'एकदमै धेरै रक्सी चुरोट खाने कारण उहाँ बिरामी हुनुभएको रहेछ। रक्सी खान नपाएपछि उहाँलाई गाह्रो हुने भनिएको छ।'
त्यसरी बिरामी हुँदा उनलाई पटकपटक उपचार गराउन लग्ने-ल्याउने भइरहेको उनले बताए। तर २२ गते बिहान भने उनलाई प्रहरीले छटपटाइरहेको अवस्थामा फेला पारेको बस्नेतले बताए।
'बिहान छटपटाइरहेको अवस्थामा फेला पर्यौं। त्यहाँबाट स्वास्थ्य चौकीमा लग्यौं। चौकीले अस्पताल लग्नु पर्छ भनेको हुँदा हामीले धुलिखेल अस्पताल लगेका थियौं,' उनले भने,'तर त्यहाँ पुगेपछि तुरून्तै मृत्यु भयो।'
अहिले शव पोष्टमार्टम गर्न काठमाडौंस्थित टिचिङ अस्पतालमा राखिएको छ। उनको पोष्टमार्टम आज हुने प्रहरीले जनाएको छ।
प्रहरी हिरासतमा हुँदा पनि उनले अस्वभाविक व्यवहार देखाउने गरेको प्रहरीले जनाएको छ।
'रक्सी नभएपछि उहाँले अस्वभाविक व्यवहारहरू देखाउने गरेको भन्ने छ,'उनले भने,'कुटपिट पनि भएनभएको भन्ने पोष्टमार्टम नभएको हुँदा भन्न सकिन्न। त्यसैले हामीले बोल्न पनि मिलेन। अरू उहाँले टाउको, हात ठोक्काउने, लगायत दैनिक जस्तो गर्नुहुन्थ्यो। उहाँको दिमागी हालत नै त्यस्तो भएको देखियो।'
उनी बिरामी भएको भन्ने जानकारी परिवार समेतलाई पनि दिइएको प्रहरीको भनाइ छ। प्रहरीले यस सम्बन्धी थप अनुसन्धान अघि बढाएको छ।