धनुषाको बटेश्वर गाउँपालिकामा लुटपाट गर्ने समूहले प्रहरीमाथि आक्रमण गरेको छ।
लुटेरा समूहले मंगलबार राति करिब ११ बजे बटेश्वर गाउँपालिकास्थित प्रहरी चौकीका प्रहरी सहायक निरीक्षक मनोज पोखरेलमाथि आक्रमण गरेको हो।
महोत्तरी भंगाहा नगरपालिका-७ का अमितकुमार पासवानलाई लुटपाट गर्ने समूहले असई पोखरेलमाथि आक्रमण गरेको धनुषाका प्रहरी उपरीक्षक वसन्त रजौरेले बताए।
उनका अनुसार मोबाइल, नगदलगायत लुटपाट भएपछि असई पोखरेल बटेश्वर गाउँपालिका-४ स्थित राम्रो चोकमा पुगेका थिए।
उनी पुग्दा लुटेरा समूहले आक्रमण गरेको रजौरेले बताए। उनको टाउकोमा चोट लागेको छ। हेल्मेट तथा ढुंगा प्रहारबाट घाइते भएका पोखरेल प्रादेशिक अस्पताल जनकपुरबाट डिस्चार्ज भइसकेका छन्।
उनको टाउकोमा ९ वटा टाँका लगाउनुपरेको छ।
घटनामा संलग्न भएको आशंकामा प्रहरीले पाँच जनालाई नियन्त्रणमा लिएको रजौरेले बताए।
