नेपाल प्रहरीको लागुऔषध नियन्त्रण ब्युरोले थप चार किलो ९०० ग्राम हेरोइनसहित चार जनालाई पक्राउ गरेको छ।
तीन जना विदेशी र एक जना नेपाली नागरिकसहित चार जनालाई पक्राउ गरेको प्रहरी उपरीक्षक जीवनकुमार श्रेष्ठले जानकारी दिए।
ब्युरोले केही समयअघि अपरेसन ह्वाइट डस्ट सञ्चालन गरेको थियो। यो अपरेसन सञ्चालन गर्दा प्रहरीले अहिलेसम्मकै सबभन्दा धेरै हेरोइन बरामद गरेको हो।
प्रहरीले सात जना दक्षिण अफ्रिकी नागरिकबाट ५१ किलो हेरोइन बरामद गरेको थियो। ४९ किलो सेतो र दुई किलो खैरो हेरोइन बरामद भएको हो।
अहिले पक्राउ पर्नेहरू पनि त्यसैको निरन्तरता भएको ब्युरोले जनाएको छ।
प्रहरीले उनीहरूलाई गत जेठ २ गते नै पक्राउ गरेको थियो। तर यसबारे सार्वजनिक गरेको भने थिएन।
फ्लाई दुबईको उडानबाट दक्षिण अफ्रिकास्थित जोहानसबर्गबाट जेठ २ गते बिहान पौने ९ बजे एक तान्जानियन नागरिक काठमाडौं आइपुगेका थिए।
३० वर्षीय अब्दल्लाह अबुलिकी भन्ने व्यक्तिको गतिविधि शंकास्पद देखिएपछि उनीमाथि प्रहरीले त्रिभुवन अन्तर्राष्ट्रिय विमानस्थलबाटै निगरानीमा राख्यो।
त्यसपछि प्रहरीले सोही दिन काठमाडौं महानगरपालिका-६ स्थित बौद्धको एक होटलबाट उनलाई नियन्त्रणमा लियो। उनले सुटकेशभित्र फल्सबटम बनाएर ४ किलो ९०० ग्राम हेरोइन लुकाएर ल्याएको अवस्थामा फेला पारेको प्रहरी उपरीक्षक श्रेष्ठले बताए।
यसमा प्रहरीले एक जना भारतीय नागरिकलाई पनि पक्राउ गरेको थियो। पछिल्ला केही घटनालाई केलाएर हेर्दा ल्याएको लागुऔषध भारत लग्ने तयारी रहेको प्रहरीको भनाइ थियो।
प्रहरीले बौद्धकै एउटा होटलबाट सोही दिन भारत हरियानाको रोतक जिल्ला बस्ने ४६ वर्षीय मुनिम सिंह र ४३ वर्षीय बिक्रमजित सिंहलाई पक्राउ गर्यो।
यसपालि प्रहरीले एक जना नेपाली नागरिकलाई पनि पक्राउ गरेको छ। यसअघि यस घटनामा नेपाली पक्राउ परेका थिएनन्।
पर्सा वीरगन्ज महानगरपालिका-१३ का ३० वर्षीय बिक्की रौनियार पक्राउ परेका हुन्।
उनीहरूमाथि लागुऔषध (नियन्त्रण) ऐन २०३३ बमोजिम लागुऔषध हेरोइन मुद्दामा म्याद थप गरी अनुसन्धान गरिरहेको ब्युरोले जनाएको छ।
यो पनि:'अपरेसन ह्वाइट डस्ट': प्रहरीले कसरी बरामद गर्न सफल भयो एक अर्ब बराबरको हेरोइन