मकवानपुरको भीमफेदीमा यात्रुबाहक बस दुर्घटना ज्यान गुमाएका सात जनामध्ये दुई जनाको सनाखत भएको छ।
जिल्ला प्रहरी कार्यालय मकवानपुरका निरीक्षक एवं प्रवक्ता रामचन्द्र घिमिरेका अनुसार मृतक सात जनामध्ये हालसम्म दुई जनाको मात्र सनाखत भएको छ। सनाखत भएकाहरू नुवाकोटका ३४ वर्षीय रघुराज न्यौपाने र बाराका अन्दुवा मियाँ ठकुराई छन्।
बिहीबार दिउँसो बा ३ ख ७८५८ नम्बरको यात्रुबाहक बस बाह्रघुम्तीमा दुर्घटनामा परेको थियो। बस अनियन्त्रित भई दुर्घटना भएको प्रारम्भिक अनुसन्धानबाट खुलेको छ। उक्त बस काठमाडौंबाट वीरगन्जकाका लागि छुटेको प्रहरी निरीक्षक घिमिरेले बताए।
उनका अनुसार उक्त बसमा चालकबाहके बालबच्चासहित ३२ जना सवार थिए। मृतकबाहेक बाँकी सबै यात्रु घाइते छन्। त्यसमध्ये चार जनाको अवस्था गम्भीर छ।
‘गाडीमा सवार सात जनाको मृत्यु भएको छ,’ घिमिरेले भने, ‘अरू २५ जना घाइते छन्। तीमध्ये २१ जनाको हेटौंडा अस्पतालमा उपचार भइरहेको छ।’
गम्भीर घाइते चार जनालाई चितवनस्थित पुरानो मेडिकल अस्पतालमा उपचारका लागि रिफर गरिएको उनले बताए।
घिमिरेका अनुसार बस चालक भने अहिसम्म फरार छन्। उनको खोजी कार्य जारी रहेको र घटनाबारे थप अनुसन्धान भइरहेको प्रहरीले जनाएको छ।
