राष्ट्रिय स्वतन्त्र पार्टीका सभापति रवि लामिछानेले एमाले अध्यक्ष ओलीलाई माछा र केरा आयात रोक्न मद्दत मागेका छन्।
राष्ट्रिय धान दिवस मनाउन एउटै विमानमा चितवन पुगेका अध्यक्ष ओली र सभापति लामिछानेले विमानस्थलमै संक्षिप्त कुराकानी गरेका थिए।
त्यहीबेला लामिछानेले आत्मनिर्भर चितवनको योजना सुनाएका थिए।
‘आत्मनिर्भर चितवन सुरू भएको छ। माछा र केराचाहिँ विदेशको यहाँ ल्याउन पाइँदैन भनेर अभियान चलिरहेको छ।त्यसमा तपाईंहरूको मद्दत चाहियो,’ उनले अध्यक्ष ओलीलाई भने।
अध्यक्ष ओलीले उनलाई ‘देशभित्रको मात्रै ल्याउने?’ भनेर सोधेका थिए।
त्यस्तै, अध्यक्ष ओली पत्नी राधिका शाक्यले अण्डा आयात पनि रोक्नुपर्ने बताएकी थिइन्।
जवाफमा लामिछानेले क्रमशः एकएक गरेर आयात रोक्ने र आत्मनिर्भर चितवन बनाउने बताएका थिए।
