स्वास्थ्यमन्त्री फेरिँदैपिच्छे मेडिकल सुपरिटेन्डेन्ट (मेसु) फेरिने क्रमले विराटनगरस्थित कोशी अस्पतालमा यसपटक पनि निरन्तरता पाएको छ।
स्वास्थ्य मन्त्रालयमा राजनीतिक नेतृत्व परिवर्तन हुनेबित्तिकै अस्पताल प्रमुख परिवर्तन हुने क्रमले निरन्तरता पाउँदा कोशीमा डा. चन्द्रभाल झाले मेसुको जिम्मेवारी पाएका छन्। यसअघि निमित्त मेसुको रूपमा रहेका डा.रवीनराज सिंहको कार्यकाल जम्मा चार महिनाको मात्रै रह्यो।
केही समयअघि विराटनगरमा सञ्चारकर्मीहरूसँग अन्तर्क्रियाका क्रममा पूर्वकै ठूलो सरकारी अस्पताल कोशीका चिकित्सक तथा पदाधिकारीहरूले ‘मन्त्री फेरिँदैपिच्छे मन्त्रीनिकट वा मन्त्रीको दल निकटका व्यक्तिलाई अस्पताल प्रमुख बनाएर पठाउने घातक चलन भएको’ बताएका थिए।
‘कसैले पनि ढुक्कका साथ निश्चित अवधि जिम्मेवारी सम्हाल्न पाउँदैन’, त्यसबेला तत्कालीन मेडिकल सुपरिटेन्डेन्ट लक्ष्मीनारायण यादवसहितका चिकित्सकहरूले भनेका थिए, ‘त्यसरी नेतृत्व अस्थिर हुँदा कुनै पनि योजना ढुक्कसाथ लागु हुन पाउँदैन।’
उनीहरूले त्यसबेला गरेको आशंका फेरि चरितार्थ बनाउँदै स्वास्थ्य मन्त्रालयले नयाँ मेसु तोकेको हो।
कोशीमा चार वर्षदेखि कार्यरत रहेका नवनियुक्त मेसु झा चार महिनाअघि ११ औं तहमा बढुवा भएका चिकित्सक हुन्। उनी छाला तथा यौनरोग विशेषज्ञ हुन्।
कोशी अस्पतालको मेडिकल सुपरिटेन्डेन्टको नियुक्तिलाई स्वास्थ्य मन्त्रालय सम्हालिरहेको दलले सधैं आफ्नो प्रतिष्ठाको विषय बनाउँदै आएका छन्। त्यसैले मन्त्री फेरिँदैपिच्छे अस्पताल प्रमुख पनि फेरिने गरेका छन्।
‘केन्द्रमा जुन दलको स्वास्थ्यमन्त्री बन्यो, त्यो दलको स्थानीय संयन्त्रको मुख्य ध्येय नै आफूनिकट मेसु ल्याउने कुरामा केन्द्रित हुन्छ’, औषधि व्यवसायी संघ मोरङका उपाध्यक्ष देशबन्धु ढकाल भन्छन्, ‘अहिले मात्रै होइन विगतमा त्यही भयो। भविष्यमा पनि हुने यही हो।’
लामो समयदेखि कोशी अस्पताल सुधारका पक्षमा लेख्दै र बोल्दै आएका औषधि व्यवसायी ढकालले भनेझैं अस्पतालमा यति चाँडो नेतृत्व फेरिन्छ कि पछिल्लो १६ महिनामा तीन जना मेडिकल सुपरिटेन्डेन्ट परिवर्तन भएका छन्।
यसअघि २०७८ फागुन ५ गते स्वास्थ्य मन्त्री विरोध खतिवडा नियुक्त भएपछि हाडजोर्नी तथा नशारोग विशेषज्ञ डा. यज्ञराज खरेल प्रमुख बनेका थिए। ६ महिना नबित्दै स्वास्थ्य मन्त्रीमा भवानी खापुङ नियुक्त भए। खापुङले डा. लक्ष्मीनारायण यादवलाई निमित्त मेसुको जिम्मेवारी दिए।
यादवको नेतृत्व छ महिना पनि टिकेन। एमाले नेता पदम गिरी जसै स्वास्थ्यमन्त्री भए, उनको पद खोसुवामा पर्यो। २०७९ फागुन २ मा डा. रविनराज सिंहलाई निमित्त मेसुको जिम्मेवारी दिइयो।
अहिले मोहनबहादुर बस्नेत स्वास्थ्यमन्त्री बनेसँगै सिंहको पद पनि चार महिनामै खोसिएको छ। नयाँ मेसुमा चन्द्रभाल झा नियुक्त भएका हुन्। साढे ३ सय शय्याको कोशी अस्पतालमा ओपीडिमा दैनिक १ हजारदेखि १५ सय बिरामीले सेवा लिने गरेका छन्।
