भक्तपुरमा तीन वटा सवारी ठोक्किँदा एक जनाको मृत्यु भएको छ।
शुक्रबार राति साढे ७ बजे सूर्यविनायक नगरपालिका-८ आदर्श भक्तपुर फ्युल सेन्टर अगाडि तीन वटा सवारीसाधन दुर्घटनामा परेको हो।
दुर्घटना हुँदा एक जना महिलाको घटनास्थलमै मृत्यु भएको जिल्ला प्रहरी परिसर भक्तपुरका डिएसपी बसन्त पाठकले जानकारी दिए।
सुरूमा जगातीबाट सूर्यविनायक जाँदै गरेको बागमती प्रदेश ०२-०२३ प २८५९ नम्बरको मोटरसाइकल र विपरीतबाट आउँदै गरेको प्रदेश नं ३ -०२-००२ प ६९३ नम्बरको मोटरसाइकल ठोक्किएका थिए।
त्यसपछि प्रदेश नं ३ -०२-००२ प ६९३ नम्बरको मोटरसाइकल अनियन्त्रित भई सूर्यविनायकबाट जगातीतर्फ जाँदै गरेको बागमती प्रदेश ०३-००१ ख २४११ नम्बरको टेलर गाडीमा ठोक्किएको थियो।
त्यसरी दुर्घटना हुँदा उक्त मोटरसाइकलमा सवार महिलालाई गाडीले किच्दा घटनास्थलमै मृत्यु भएको डिएसपी पाठकले बताए।
उनका अनुसार मृतक काभ्रे बनेपा नगरपालिका-२ घिमिरेगाउँ बस्ने २५ वर्षीया नविना काफ्ले घिमिरे हुन्। उनका ३० वर्षीय श्रीमान किरण घिमिरेले मोटरसाइकल चलाएका थिए। उनको मध्यपुर ठिमी अस्पतालमा उपचार भइरहेको छ।
बागमती प्रदेश ०२-०२३ प २८५९ नम्बरको मोटरसाइकल चालक ओखलढुंगा सुनकोशी गाँउपालिका-४ घर भई भक्तपुर नलिन्चोक बस्ने ३२ वर्षीय हिरा बडालको पनि मध्यपुर ठिमी अस्पतालमा उपचार भइरहेको प्रहरीले जनाएको छ।
दुर्घटना भएका ३ वटै सवारीसाधनसहित गाडीका चालक वीरगन्ज महानगरपालिका-२ का२५ वर्षीय हासिब हुसेन अन्सारीलाई प्रहरीले पक्राउ गरेको छ।
प्रहरी वृत्त जगाती भक्तपुरले घटनाको अनुसन्धान अघि बढाएको छ।
