सुनसरीको इटहरी उपमहानगरले नगर क्षेत्रका सामुदायिक विद्यालयका विद्यार्थीलाई दिवा खाजा पकाएरै खुवाउनु पर्ने नियम लगाएको छ। विद्यालयहरूको दिवा खाजाको टेन्डर आह्वान गर्ने क्रममा उपमहानगरले प्रत्येक दिनको मेनु नै तयार पारेको छ।
विद्यालयमा जंक फुड नखुवाउन र विद्यार्थीका लागि पोषिलो खानेकुरा खुवाउन भन्दै उपमहानगरले यस्तो नियम बनाएको हो।
उपमहानगरले हरेक दिन फरक–फरक खाजाको मेनुसहित बोलपत्र आह्वान गरेको मेयर हेमकर्ण पौडेलले बताए।
उपमहानगरका अनुसार हरेक आइतबार प्रति विद्यार्थी २१० ग्राम तौलको तीन किसिमका फलफूल खुवाउनुपर्नेछ।
सोमबार अण्डा र चिउरा शाकाहारीका लागि मटरसँगै पनिर र चिउरा खुवाउनुपर्नेछ। मंगलबार मिक्स गेडागुडीसँग चिउरा र बुधबार चामलको खीर र तरकारी खुवाउनुपर्नेछ।
बिहीबार दही, चिउरा र तरकारी खुवाउनुपर्नेछ। शुक्रबार खसी वा कुखुराको मासु र चिउरा खुवाउनुपर्नेछ भने शाकाहारीका लागि मटर–पनीर र चिउरा खुवाउनुपर्नेछ।
इटहरी उपमहानगरपालिकाले अब नयाँ मेनु सार्वजनिक गरेसँगै दिवा खाजा कार्यक्रमका लागि चालु आर्थिक वर्षमा नौ करोड ३२ लाख ६ हजार २० रुपैयाँ ८८ पैसा खर्च हुने उपमहानगरपालिकाले जनाएको छ।
इटहरीका मेयर हेमकर्ण पौडेलले संघीय सरकारबाट प्राप्त १ करोड ९८ लाख रुपैयाँ ८४ हजार संघीय सरकारबाट प्राप्त अनुदान र बाँकी उपमहानगरपालिकाले दिवा खाजामा लगानी गर्ने बताए।
इटहरी क्षेत्रमा ५० वटा सामुदायिक शिक्षालय छन्। जसमा सामुदायिक, धार्मिक र बालविकास केन्द्र पर्दछन्। यी विद्यालयका आठ हजार २८ जना दिवा खाजा कार्यक्रमबाट लाभान्वित हुने उपमहानगरले जनाएको छ।
