स्रोत नखुलेको रकम फेला परेपछि विमानस्थलका कर्मचारीको आँखा छलेर भाग्न सफल आन्तरिक राजश्व कार्यालय तुलसीपुरका एक जना कर अधिकृत पाँच दिन बितिसक्दा पनि सम्पर्कविहीन छन्।
भदौ २५ गते बिहान सँगै यात्रारत अर्का कर अधिकृत खगेन्द्र सापकोटाको साथबाट स्रोत नखुलेको २६ लाख रकम फेला परेपछि प्रहरीले उनीमाथि सोधपुछ गर्ने क्रममा अर्का कर अधिकृत दीपक पौडेल प्रहरीको आँखा छलेर सुटुक्क भाग्न सफल भएका थिए।
बाँकेका प्रहरी प्रवक्ता डिएसपी नारायण डाँगीका अनुसार पक्राउपछि कर अधिकृत सापकोटालाई फरार उनका साथी कर अधिकृत पौडेललाई फोन सम्पर्क गर्न लगाइएको थियो। त्यसपछि पौडेलले केहीबेरमा आफैं सम्पर्कमा आउने वाचा गरेका थिए।
तर घटना भएको पाँच दिन बितिसक्दा पनि उनी प्रहरी सम्पर्कमा आएका छैनन्।
प्रवक्ता डाँगीले हालसम्म फरार रहेका कर अधिकृत पौडेल प्रहरी सम्पर्कमा नआएको बताए।
‘हामीले दाङमा पनि बुझ्दै आएका छौं,’ उनले भने, ‘उहाँ दाङ प्रहरीको सम्पर्कमा पनि हुनुहुन्न।’
दाङ जिल्ला प्रहरी प्रमुख एसपी रामबहादुर केसीले पनि फरार कर अधिकृत पौडेलको बारेमा अनभिज्ञता प्रकट गरे।
आन्तरिक राजश्व कार्यालय तुलसीपुरका प्रमुख कर अधिकृत टीकाराम चौलागाईंले हालसम्म पौडेल कार्यालयमा उपस्थित नरहेको सेतोपाटीलाई बताए।
कर अधिकृत सापकोटा पक्राउ परेको दिन आन्तरिक राजश्व कार्यालय तुलसीपुरका प्रमुख कर अधिकृत चौलागाईंले कर अधिकृतद्वय कर्णाली प्रदेशको पहाडी जिल्ला रूकुम पश्चिमको अनुगमनपछि फर्किआएको र घर बिदा जाने इच्छा व्यक्त गरी बिदा मागेबमोजिम एक दिनको बिदा दिइएको सेतोपाटीलाई जानकारी दिए।
‘पौडेलजीले भदौ २५ गते बर्थ डे मनाउन जान्छु र दोस्रो दिन भदौ २६ गते नै फर्किन्छु भनेको हुँदा भई परि आउने बिदा अन्तर्गत मौखिक रूपमा एक दिनको बिदा दिइएको थियो,’ चौलागाईंले भने, ‘तर, आजका मितिसम्म उहाँ कार्यालय पनि आउनु भएको छैन र सम्पर्कमा पनि आउनु भएको छैन।’
जिल्ला प्रहरी प्रवक्ता डाँगीका अनुसार सोमबार बाँकेस्थित राँझा विमानस्थलदेखि झन्डै १२ किलोमिटर उत्तरको पूर्व पश्चिम राजमार्गको कोहलपुर बजार क्षेत्रमा पुगेपपिछ फरार कर अधिकृत पौडेलले मोबाइल स्विचअफ गरेका थिए।
उक्त दिन बिहान ७ बजेतिर श्री एयरलाइन्सको जहाजमार्फत बाँकेबाट काठमाडौं जान लागेका दुई कर अधिकृतमध्ये सापकोटालाई सुरक्षाकर्मीले चेकजाँचका क्रममा स्रोत नखुलेको २६ लाख रकम बरामद भएको थियो। त्यतिखेर उनका साथी पौडेल सँगै केही पछाडि थिए। प्रहरीले सापकोटालाई सोधपुछ थालेपछि त्यतिखेरै पौडेल सुटुक्क बाहिर निस्किएर भाग्न सफल भएका थिए।
‘स्क्यानिङ मेसिनबाट चेकजाँच गर्ने क्रममा कर अधिकृत सापकोटाको झोलामा लाखौं रकम फेला परेपछि सुरक्षाकर्मीले उहाँलाई सोधपुछ गर्दैगर्दा केही पछाडि रहेका पौडेल सुटुक्क निस्किएर भाग्न सफल हुनु भएको थियो,’ जिल्ला प्रहरी प्रवक्ता डाँगीले त्यसदिन भनेका थिए, ‘प्रहरीलाई पौडेल पनि सापकोटा सँगै यात्रारत व्यक्ति हुन् र उनीहरूसँगै यात्रारत छन् भन्ने कुरा जानकारी नहुँदा एक जना उम्किन सफल भएका हुन्।’
यी पनि:
स्रोत नखुलेको २६ लाख रुपैयाँसहित नेपालगञ्ज विमानस्थलमा पक्राउ परे कर अधिकृत
नेपालगञ्ज विमानस्थलबाट पक्राउ परेका कर अधिकृतसँग आएका अर्का कर्मचारी फरार
अनुगमनबाट फर्किएपछि घर बिदा मागेका थिए विमानस्थलमा पक्राउ परेका कर अधिकृतले
नेपालगन्ज विमानस्थलबाट फरार कर अधिकृतले भने- म आफैं प्रहरी कार्यालय आउँछु
-1715411980.jpg)
