पाल्पामा कुटपिटबाट एक जनाको मृत्यु भएको छ।
तिनाउ गाउँपालिका-२ घोडेबासमा आइतबार मध्यराति कुटपिट हुँदा सोही स्थानका २४ वर्षीय सुनिल खत्रीको मृत्यु भएको जिल्ला प्रहरी कार्यालयका प्रवक्ता सन्तोष चन्दले जानकारी दिए।
उनका अनुसार आइतबार घोडेबासमा तीज कार्यक्रम आयोजना भएको थियो। उक्त कार्यक्रममा सुनिल र उनका साथीहरूबीच झगडा भएको थियो।
त्यसै विषयमा राति साढे १२ बजे खत्रीमाथि पुन: कुटपिट भएको प्रवक्ता चन्दले बताए।
कुटपिटबाट गम्भीर घाइते भएका खत्रीको उपचारको लागि लुम्बिनी प्रादेशिक अस्पताल बुटवल रुपन्देहीमा लगिएको थियो। त्यहाँ उपचारको क्रममा सोमबार बिहान १:४५मा मृत्यु भएको हो।
उनीमाथि कुटपिट गरेको आरोपमा प्रहरीले शंकास्पद ४ जनालाई पक्राउ गरी अनुसन्धान अघि बढाएको जिल्ला प्रहरी कार्यालय पाल्पाले जनाएको छ।
