मकैबारीमा लगाएको आगोमा परी दाङमा एक महिला जलेर गम्भीर घाइते भएकी छन्।
बबई गाउँपालिका–७ मलै गाउँकी ४५ वर्षीया लिला गिरी आफ्नै बारीमा मकै ढोड जलाउन बालेको आगोमा परी गम्भीर घाइते भएकी हुन्।
जिल्ला प्रहरी प्रमुख एसपी रामबहादुर केसीले घाइते गिरीको बाँकेको नेपालगंजस्थित भेरी अस्पतालमा उपचार भइरहेको सेतोपाटीलाई बताए।
प्रहरीका अनुसार घटना आइतबार दिउँसो ३ बजेतिरको हो। छारे रोगी समेत रहेकी गिरी एक्कासी लडेर मकैका ढोडमा लगाएको आगोमा परेकी थिइन्। उनको अनुहार र खुट्टामा जलनबाट घाउहरू बनेको प्रहरीले बताएको छ।
घाइते गिरीलाई बेलुका पौने ८ बजे तुलसीपुरस्थित राप्ती प्रादेशिक अस्पताल ल्याएको थियो। आगोले पोलेका बिरामीको उपचार गर्ने अस्पताल जिल्लामा नरहेको हुँदा प्रारम्भीक उपचारपछि तत्काल गिरीलाई बाँकेको भेरी अस्पतालमा रिफर गरी उपचार भइरहेको प्रहरीले जानकारी दिएको छ।