जनकपुरधाम उपमहानगरपालिका-२५ स्थित केउटानी टोलमा नालीको चेम्बरमा डुबेर मृत्यु भएको घटनामा पीडित पक्षले मिलापत्र भएको छ।
स्थानीय रञ्जित मुखिया र पुनिताका १७ महिने छोरा रोहनको गत भदौ २९ गते चेम्बरमा डुबेर मृत्यु भएको थियो।
तीन वर्षअघि निर्माण भएको सडकको चेम्बर ढक्कन नलगाई छोडिएको थियो।
आइतबार वडाध्यक्ष चन्देश्वर साहको समन्वयमा वडा कार्यालयमा भएको छलफलमा मृतक परिवारलाई २ लाख एक सय रुपैँया दिने सहमती भएको हो।
‘उपभोक्ता समितीले यो महिनाभित्र त्यो पैसा पीडित परिवारलाई दिने सहमती भएको छ। सबै कुरा टुंगो लागिसक्यो, उपभोक्ता समिती विरुद्ध कानुनी कारबाहीमा पनि नजाने कुरा पनि भएको छ,’ वडाध्यक्ष साहले भने।
उनका अनुसार असोज महिना भित्रै उपभोक्ता समितिले चेम्बरमा ढक्कन लगाउने समेत सहमती भएको छ। बैठकमा प्रदेशसभा सदस्य दिपेन्द्र ठाकुर पनि उपस्थित थिए। उनले मृतक परिवारलाई प्रदेश सरकारको विपन्न आवास योजनाबाट दुई कोठे घर समेत बनाइदिने आश्वासन दिएका छन्।
केउटानी टोलमा आर्थिक वर्ष २०७७ ७८ मै बनेको ढलान सडकमा अहिलेसम्म चेम्बरको ढक्कन लगाइएको छैन। संघीय आयोजना कार्यान्वयन इकाइ कार्यालयले ५१ वटै चेम्बरको ढक्कन लगाएर सबै निर्माण कार्य सम्पन्न भइसकेको ठहर गरी उभभोक्ता समितिलाई भुक्तानी दिएको थियो।
तर नालीको ढक्कन लगाउने रकम उपभोक्ता समितीकै सदस्यले खल्तीमा राखेका थिए।
सहरी विकास मन्त्रालयको सघन सहरी विकास कार्यक्रमअन्तर्गत केउटानी टोलमा साढे तीन सय मिटर सडक ढलान भएको थियो।
संघीय आयोजना कार्यान्वयन इकाइको धनुषा कार्यालयको ५० लाख रुपैयाँ बजेटमा सडक ढलान भएको थियो।
