सुनसरीको इटहरी उपमहानगरपालिकाले खोला तथा पैनी मिचेर बनाइएका संरचनामा डोजर लगाएको छ।
सहरमा हरेक वर्ष बाढीले दु:ख दिएको भन्दै अतिक्रमित क्षेत्रमा उपमहानगरले डोजर चलाएको हो।
इटहरीस्थित टेंग्रा खोलाको सिरानबाट मंगलबारदेखि खोलामा डोजर चलाउन सुरू गरेको मेयर हेमकर्ण पौडेलले बताए। बारम्बार सूचना जारी गर्दा पनि सम्बद्धले नभत्काएपछि उपमहानगर आफैंले भत्काउन सुरू गरेको मेयरले जानकारी दिए।
टेंग्रा खोला, खेती खोला र सुकुमारी पैनीको दुवै किनारबाट ६/६ मिटर छाडेर भवन संरचना बनाउनुपर्ने प्रचलित कानुनलाई आधार मानेर उपमहानगरले खोला र पैनीको दुवैतर्फ ६/६ मिटर नछोडिकन बनेका भवन संरचना हटाउन सुरू गरेको हो।
बर्खाको बेला सामान्य पानी पर्दा पनि इटहरी डुबानमा पर्ने गरेको छ। ठूलो पानी पर्दा इटहरीमा भयावह स्थिति सिर्जना हुने खतरा रहन्छ। जसले गर्दा हरेक बर्खाको बेला खोलाको तटीय क्षेत्रमा बसोबास गर्नेहरू त्रसित हुने गरेका छन्। अब आउँदो बर्खामा इटहरीमा खोलाको तटीय बस्तीमा बस्नेलाई जोगाउन इटहरी उप–महानगरपालिकाले अवैध संरचना हटाउन सुरू गरेको मेयर पौडेलले बताए।
इटहरी उपमहानगरपालिकाभित्र २० वटा वडा छन्। तीमध्ये बाढीबाट प्रभावित हुने इटहरीका विशेष गरी ३, ४, ९, १०, ११ र १२ नम्बर वडा छन्। २०७४ मा आएको बाढीका कारण ९ जनाको मृत्यु भएको थियो। अघिल्लो वर्षको बाढीले ४ जनाको मृत्यु भएको थियो। अरू थुप्रै अन्नबाली र भौतिक पूर्वाधारमा क्षति पुगेको थियो।
४० को दशकमा इटहरीको भूगोलमा मानव बस्ती पातलो थियो। यहाँको सम्पूर्ण जमिन खेतीमा प्रयोग हुन्थे। जताततै खोला पैनी वा पानी बग्ने निकासका ठाउँहरू खुला थिए। जसले गर्दा सहजै पानी निकास हुने गर्थ्यो। तर, सहर बिस्तार हुँदा भने निकासहरू थुनिएको र डुबान हुने गरेको उपमहानगरको भनाइ छ।