अख्तियार दुरूपयोग अनुसन्धान आयोगले राष्ट्रिय अनुसन्धान विभागमा प्रमुख अनुसन्धान अधिकृतलाई पद बढुवाको लागि नक्कली शैक्षिक प्रमाणपत्र पेस गरेको आरोपमा मुद्दा दायर गरेको छ।
अनुसन्धान विभागमा कार्यरत प्रमुख अनुसन्धान अधिकृत हिराबाबु भट्टराई (हिरावाबु भट्टराई) लाई पद बढुवामा नक्कली शैक्षिक प्रमाणपत्र पेस गरेको आरोप अख्तियारले बुधबार विशेष अदालतमा मुद्दा दायर गरेको हो।
भट्टराईले बिहार इन्टरमिडिएट एजुकेशन काउन्सिल, पटना, भारतबाट प्राप्त प्रवीणता प्रमाणपत्र तहको नक्कली शैक्षिक योग्यताको प्रमाणपत्र राष्ट्रिय अनुसन्धान विभागमा २०५५ साल वैशाख ८ गते पेस गरेका थिए। सोही झूटा शैक्षिक प्रमाणपत्रलाई आधार बनाई उनी २०५६ साल जेठ १० गते सहायक निरीक्षक पदमा नियुक्त लिएको अख्तियारको आरोप छ।
अख्तियारका प्रवक्ता सुरेश न्यौपानेका अनुसार २०६४ साल असार ३२ गते वरिष्ठ अनुसन्धान सहायक पदमा बढुवा भएका थिए, २०७१ माघ ५ गते अनुसन्धान अधिकृत पदमा बढुवा भएका थिए। त्यस्तै, २०७५ साल फागुन १३ गते प्रमुख अनुसन्धान अधिकृत पदमा बढुवा हुँदा शैक्षिक योग्यताबापतको अंक प्राप्त गरेका थिए।
सम्बन्धित प्रमाणपत्र जारी गर्ने निकायबाट प्राप्त प्रमाणीकरणको बेहोरामा उम्मेदवारको नाम र कुल प्राप्ताङ अभिलेखसँग नमिलेको पुष्टि भएको अख्तियारको प्रवक्ता न्यौपानेले जानकारी दिए।
नक्कली शैक्षिक प्रमाणपत्र पेस गरी विभिन्न पदमा बढुवा भई पद, ओहदा तथा सेवा सुविधासमेत प्राप्त गरेको देखिएकाले निजको उक्त कार्य साविक भ्रष्टाचार निवारण ऐन, २०१७ को दफा १२ र भ्रष्टाचार निवारण ऐन, २०५९ को दफा १६ को उपदफा (१) बमोजिमको कसुर भएको आयोगले जनाएको छ।
