काठमाडौंको कपनमा ट्याक्सी चालकमाथि कुटपिट गरेको आरोपमा दुई जना पक्राउ परेका छन्।
बुढानिलकण्ठ नगरपालिका वडा नम्बर १२ कपन दुर्गा मन्दिर नजिकै गत मंगलबार एक जना ट्क्याक्सीका चालकमाथि कुटपिट गरी लुटपाट गरेको आरोपमा प्रहरीले दुई जनालाई पक्राउ गरेको हो।
पक्राउ पर्नेमा तार्केश्वर नगरपालिका-६ बस्ने २७ वर्षीय प्रशान्त जंग कार्की र बुढानिलकण्ठ नगरपालिका ३४ वर्षीय राजु गुरूङ छन्।
उनीहरूलाई प्रहरीले शुक्रबार बसुन्धारा चोकबाट पक्राउ गरेको जिल्ला प्रहरी परिसर काठमाडौंका एसपी नवराज अधिकारीले जानकारी दिए।
पक्राउ परेका व्यक्तिहरूले बा २ ज ३५९८ नम्बरको ट्याक्सी चालकलाई कुटपिट गरेर उनको मोबाइल, १८ हजार रुपैयाँ, घडी, ब्लुबुक, ल्यापटप र वालेट लुटेर भागेको आरोप छ।
उनीहरूमाथि प्रहरीले थप अनुसन्धान अघि बढाएको छ।
