सुनसरीको हरिनगर बजार तनावग्रस्त छ।
हरिनगर गाउँपालिका वडा-४ स्थित गाउँपालिकाको कार्यालय रहेको बजार क्षेत्र मध्याह्नदेखि उत्पन्न भएको तनाव अहिलेसम्म मत्थर भएको छैन।
अहिलेसम्म प्रहरीले ८० राउन्ड हवाई फायर गरेको र ४० सेल अश्रु ग्यास प्रहार गरेको सुनसरीका निमित्त प्रमुख जिल्ला अधिकारी वेदराज फुयालले जानकारी दिए।
‘त्यति हुँदा पनि भीड मत्थर भएको छैन। उनीहरू प्रहरीलाई ढुंगामुढा गरिरहेका छन्,’ निमित्त प्रजिअ फुयालले भने।
प्रहरीले चलाएको गोली लागेर दुई जना घाइते भएको हरिनगर गाउँपालिकाकी उपाध्यक्ष रिमझिम कुमारी भगतले बताइन्।
‘अहिले पनि झडप भइरहेको छ। उहाँहरू दुवैलाई उपचारका लागि अस्पताल लगिएको छ,’ उनले भनिन्।
निमित्त प्रजिअ फुयालले भने घाइतेहरूको विषयमा विवरण संकलन भइरहेको बताए।
बिहीबार एक युवक कुटिएपछि सुरू भएको विवादले शुक्रबार बिहानैदेखि हरिनगर बजारमा दुई समूहबीच झडपको स्थिति देखिएको थियो।
सुनसरी प्रशासनले झडप हुने अवस्था आउन नदिनका लागि मध्याह्नदेखि निषेधाज्ञा जारी गरेको थियो।
दुई समूहबीच झडप हुने स्थिति भएपछि प्रहरीले एउटा समूहलाई सम्झाइबुझाई गरी घर पठाएको थियो। अर्को समूहलाई पनि सम्झाइबुझाई फर्काउन खोज्दा उल्टै प्रहरीमाथि ढुंगामुढा गरेको उनले बताए।
दिउँसो स्थानीय जनप्रतिनिधि र राजनीतिक दलका प्रतिनिधिहरूसँग छलफल गरी समाधानको प्रयास गरिएको पनि निमित्त प्रजिअ फुयलले बताए।
