सशस्त्र प्रहरी बलको केन्द्रीय स्टोरमा आगलागी भएको बारे बुझ्न छानबिन समिति गठन भएको छ।
सशस्त्र प्रहरी बल कार्य विभाग प्रमुख प्रहरी अतिरिक्त महानिरीक्षक (एआइजी) वंशिराज दाहालको अध्यक्षतामा ९ सदस्यीय छानबिन समिति गठन गरिएको छ।
सोमबार अपरान्न ४ः५० बजे विद्युत सर्ट भई काठमाडौंको बलम्बुस्थित सशस्त्र प्रहरीको केन्द्रीय स्टोरमा आगो लागेको हो। उक्त आगो नियन्त्रणमा लिने प्रयास भइरहेको सशस्त्र प्रहरी बलका सहप्रवक्ता डिएसपी शैलेन्द्र थापाले जानकारी दिए।
उनका अनुसार दमकल, ट्यांकर, वाटर क्यानन लगायत प्रयोग गरिरहे पनि आगलागी अझै पूर्ण रूपमा नियन्त्रणमा आउन सकेको छैन। आगलागी नियन्त्रणमा लिन एक हजारभन्दा बढी सुरक्षाकर्मी परिचालन भएका छन्।
उक्त स्टोरमा सशस्त्र प्रहरी बलका जिन्सी सामग्री राखिएका थिए।
घटनास्थलमा उपप्रधान एवं गृहमन्त्री रवि लामिछाने, सशस्त्र प्रहरी बलका महानिरीक्षक राजु अर्याल लगायत पुगेका थिए। त्यस क्रममा महानिरीक्षक अर्यालले समिति बनाएर यसबारे जाँच गर्न थालिसकेको जानकारी दिएका थिए।
गृहमन्त्री लामिछानेले बस्ती आसपासमा रहेका सिसिटिभी क्यामराहरू जाँच गर्न समेत निर्देशन दिएका छन्।
यस घटनामा मानवीय क्षति भएको छैन। भौतिक क्षति विवरणबारे सशस्त्र प्रहरीको समितिले अध्ययन गर्नेछ।
