पर्वतमा दम्पतीको हत्या भएको घटना हप्ता दिन बित्दा पनि आरोपीको पत्ता लाग्न सकेको छैन।
जलजला गाउँपालिका वडा नम्बर २ स्थित दह भन्ने ठाउँमा बस्ने ६९ सूर्यबहादुर घर्ती र उनकी ६७ श्रीमती गमला घर्तीको हत्या भएको घटनामा आरोपी पहिचान हुन नसकेको हो।
दम्पतीको चैत २० गते बिहान घरमा शव फेला परेको थियो। उक्त घटना भएको ९ दिन पुगिसकेको छ।
जिल्ला प्रहरी कार्यालय पर्वतका डिएसपी खुमलाल भुसालका अनुसार अनुसन्धान अझै जारी छ। तर त्यसबारे बताउन मिल्ने गरी कुनै उपलब्धी भइनसकेको उनी बताउँछन्।
‘अहिले नै भन्न मिल्ने गरी केही छैन। हामी अनुसन्धान गर्दैछौं,’ उनले सेतोपाटीसँग भने, ‘हामीले विभिन्न कोणबाट हेरिरहेका छौं।’
यस घटनाको अनुसन्धान गर्न केन्द्रीय अनुसन्धान ब्युरो (सिआइबी) को टोलीले पनि पर्वत पुगेको छ।
प्राविधिक अनुसन्धान गर्नका लागि सिआइबीको टोली पर्वत पुगेको हो। अहिले उक्त टोली र जिल्ला प्रहरी कार्यालयको टोलीले संयुक्त अनुसन्धान थालेको हो।
डिएसपी भुसालले यो घटना लुटपाटका लागि भएको हुनसक्ने प्रारम्भिक अनुसन्धानबाट देखिएको बताएका थिए। उक्त घरमा श्रीमान-श्रीमतीमात्रै बस्थे। उनीहरूको घर नजिकै अन्य घरहरू छैनन्।
घटनास्थलबाट मृतक सूर्यबहादुरले लगाउने गरेको सुनको औंठी गायब छ। प्रहरीका अनुसार गमलाले लगाउने गरेको सुनको सिक्री र कानमा रहेको मुन्द्रा भेटिएको छैन।
परिवारका सदस्यले ती सुनका गहना हराएको बताएका हुन्। त्यसकारण उनीहरूको हत्या कसैले लुटपाट गर्ने उद्देश्यले गरेको हुनसक्ने प्रहरीको प्रारम्भिक विश्लेषण छ।
लुटपाट गरिएका गहना पनि अझै फेला पर्न सकेको छैन। त्यसका लागि प्रहरीले विभिन्न ठाउँहरूमा पत्राचार समेत गरेको छ।
यो घटनामा एक जना व्यक्तिको मात्रै संलग्नता हो वा बढीको संलग्नता हो भन्नेबारे पनि अनुसन्धान भइरहेको प्रहरीले जनाएको छ।
प्रहरीले घटनामा प्रयोग भएको हतियार पनि बरामद गरेको छ। प्रहरीका अनुसार हत्या गर्न हँसियाले टाउको र घाँटीमा प्रहार गरेको देखिन्छ।
सूर्यबहादुर खाटमा मृत फेला परेका थिए। गमला भुइँमा घोप्टो परेको अवस्थामा फेला परेकी हुन्।
प्रहरीले घर परिवार, आफन्त, छिमेकीलगायत विभिन्न व्यक्तिहरूसँग सोधपुछ गरिरहेको छ। अनुसन्धानकै लागि प्रदेश प्रहरी कार्यालय पोखराबाट तालिमप्राप्त कुकुरसहितको टोली पनि खटाइएको थियो।
उनीहरूको हत्या चैत १९ गते राति तिरै भएको हुनसक्ने प्रहरीको प्रारम्भिक अनुसन्धानले देखाएको छ।
