कर्णाली प्रदेश अस्पताल सुर्खेतमा उपचारको क्रममा २२ वर्षीया महिलाको मृत्यु भएको घटनाको वार्ता निष्कर्षविहीन भएको छ।
दैलेख आठबिस नगरपालिका-५ की भीमा गुरूङ उपचारको लागि बिहीबार अस्पताल पुगेकी थिइन्। तर उपचारको क्रममा उनको मृत्यु भएपछि आफन्तहरू आन्दोलित भएका हुन्।
यसबारे शुक्रबार आफन्त र अस्पताल प्रशासनबीच वार्ता भएको थियो। तर वार्ता सफल हुन नसकेपछि आफन्तहरू फेरि आन्दोलनमा उत्रिएका हुन्।
सात महिने शिशुकी आमा समेत रहेकी भीमा पेट दुखेको भन्दै हिँडेर अस्पताल पुगेकी थिइन्। तर ‘पाठेघर सफा’ गर्नेक्रममा उनको मृत्यु भएको भन्दै आफन्तहरू आन्दोलनमा उत्रिएका हुन्।
आफन्तले मृतक परिवारलाई उचित राहत दिनुपर्ने र उपचारमा संलग्न चिकित्सकलाई कारबाही गर्नुपर्ने माग राखेका छन्। माग सम्बोधन नभए आन्दोलन कायम रहने मृतक भीमाका जेठाजु हर्कबहादुर बलामीले बताए।
अस्पतालले यस घटनामा के भएको हो भन्ने खुलाएको छैन। बिरामीको रिपोर्टले अवस्था असामान्य देखिएको र अपरेसन गरेर भ्रूण फाल्ने क्रममा मृत्यु भएको अस्पतालले जनाएको छ।
यसका बारेमा प्राविधिक कुरा बुझ्ने काम भइरहेको अस्पतालका सूचना अधिकारी विनोद बस्नेतले बताए।
