राष्ट्रिय स्वतन्त्र पार्टीका सांसद शिव नेपालीले कास्कीका ग्रामीण भूभागका विभिन्न पूर्वाधार निर्माणका लागि सरकारले बजेट नपठाएकोमा असन्तुष्टि व्यक्त गरेका छन् ।
बिहीबार प्रतिनिधि सभाको शून्य समयमा बोल्दै सांसद नेपालीले मन्त्री र शक्तिशाली नेताका क्षेत्रमा मात्रै बजेट परेको आरोप लगाउँदै विकासको पर्खाइमा रहेका कास्कीका गाउँहरूमा बजेट नपठाइएको बताएका हुन्।
'पर्यटनको राजधानी घोषणा गर्ने पोखरा लगायत समग्र कास्कीलाई बजेट विनियोजन हेर्दा सबै बनिसकेको जस्तो लाग्छ। बजेट पठाउनुपर्दैन्। कास्की क्षेत्रनम्बर ३ र २ का गाउँहरू कर्णलीका गाउँजस्तै विकास कुरेर बसेको छ,' उनले भने।
उनले घान्द्रुक, सिकलेश, तान्तिङ, वार्चोकजस्ता कैयौं पर्यटकीय गाउँहरूमा पूर्वाधार बन्दै गरेको तर बजेट नहुँदा सम्पन्न हुन नसकेको बताए।
'गाउँहरू जाने बाटोहरू, जनतालाई के जबाफ दिने? मन्त्री र शक्तिशाली नेताको क्षेत्रमा मात्रै बजेट पर्ने भएपछि अब बजेट पाउन मन्त्रालय धाउन पर्ने हो?,' उनले भने।
सांसदको काम बजेट माग्दै हिँड्ने हो कि नीति नियम ऐन कानुन बनाउने हो प्रष्ट पारिदिन पनि उनले आग्रह गरे।
