गजामा इसराइलले जमिन र आकाशबाट आक्रमण तीव्र पारेपछि त्यहाँबाट मानिसहरू भाग्न थालेका छन्।
विश्वका अधिकांश देशहरूको विरोधका बाबजुद इसराइलको मन्त्रिपरिषद्ले गजामा जमिन र आकाशबाट आक्रमण तीव्र पार्ने र हमासलाई सधैँका लागि अन्त्य गर्ने निर्णय गरेको थियो।
इसराइली रक्षामन्त्री इसराइल कात्जले गजा जलिरहेको भनेका छन्।
सुरूवातमा गजाका बासिन्दाहरू इसराइलले बम हानिरहेपनि आफ्नो थातथलो छाडेर कतै नजाने बताउँदै आएका थिए।
तर इसराइली सेनाले जमिन र आकाशबाट अन्धाधुन्ध आक्रमण गर्न थालेपछि मानिसहरू गजा सहर छाडेर भाग्न थालेको विभिन्न अन्तर्राष्ट्रिय सञ्चारमाध्यमहरुले जनाएका छन्।
कतारी टेलिभिजन नेटवर्क अलजजिराका अनुसार इसराइली हमलाबाट आइतबार मात्रै गजामा ९१ जनाको मृत्यु भएको छ।
इसराइली सेनाले लगातार मानिसहरूलाई गजा छाड्न आह्वान गर्दै आइरहेको छ।
पछिल्लो साता गजाका ठुल्ठूला आवासीय भवनमा इसराइली सेनाले बम खसालेर ध्वस्त बनाएको छ।
ती ठुल्ठूला भवनमा प्यालेनस्टिनीहरूलाई ढाल बनाएर हमासका लडाकूहरू बसिरहेको इसराइलको दाबी छ।
आइडिएफले त्यस्ता भवनहरुमा बसिरहेका नागरिकहरूलाई खाली गर्न भनेका थिए। अल जजिराका अनुसार साना ठूला गरी ५० भन्दा बढी बहुतले भवनहरु इसराइलल बम हानेर ध्वस्त बनाएको छ।
गजामा जमिन र आकाशबाट आक्रमण चर्किएपछि मानिसहरू दक्षिणी भूभागहरूतर्फ सर्न थालेका छन्।
मंगलबार ठूलो संख्यामा मानिसहरू झोलीतुम्लो बोकेर गजा छाड्दै गरेको दृश्य विभिन्न अन्तर्राष्ट्रिय सञ्चारमाध्यमहरुले सार्वजनिक गरेका छन्।
उनीहरूक रिक्सा, भ्यान र गधामा आफ्नो सामानहरू राखेर गजाबाट निस्किरहेका थिए।
संयुक्त राष्ट्रसंघले इसराइलले गजामा नरसंहार गरेको निष्कर्ष निकालिसकेको छ।
इसराइलसँग राम्रै सम्बन्ध रहेका मुलुकहरूले पनि इसराइलले गजामा गरेको आक्रमण र त्यहाँ ठूलो संख्यामा मानिसहरूको मृत्यु भएको विषयमा निन्दा गरेको छ।
गजामा नरसंहार गरेको संयुक्त राष्ट्रसंघ र अन्य राष्ट्रहरुको भनाइलाई इसराइले आधारहिन भनेको छ।
गजामा हमासविरूद्धको कारबाही भन्दै गरिएको आक्रमणलाई अमेरिकाले पनि समर्थन जनाएको छ।
अमेरिकी विदेशमन्त्री मार्को रूबिओ केही दिनअघि मात्रै इसराइल पुगेका थिए। त्यहाँ उनले गजामा हमासविरूद्धको आक्रमणलाई अमेरिकाको समर्थन रहेको बताएको अन्तर्राष्ट्रिय समाचार संस्था रोयटर्सले जनाएको छ।
अमेरिकी राष्ट्रपति डोनाल्ड ट्रम्पले पनि गजामा हमासले बन्धकहरूलाई अथवा नागरिकलाई ढाल बनाए उनीहरूले ठूलो मूल्य चुकाउनुपर्ने भनेका छन्।
ट्रम्पले पनि हमासले बाँकी रहेका बन्धकहरू एकैसाथ छाड्नुपर्ने भन्दै आएका छन्।
हमासको बन्धकमा कम्तिमा ५० जना अझै छन्। तीमध्ये कम्तिमा २० जना बन्धक जिवितै रहेको अनुमान गरिएको छ।
हमासले इसराइलले आक्रमण तीव्र पारे मृत्यु भइसकेको बन्धकहरूको शव जोगाउन सम्भव नहुने बताएको छ।
इसराइलले गजामा आक्रमण बढाउने निर्णयमा इसराइली जनताहरूले विरोध जनाएका छन्।
उनीहरुले त्यसबाट गजामा बाँकी रहेका बन्धकहरूको जीवन खतरामा पर्ने बताउँदै संवादबाटै समस्या समाधान गर्न माग गरेका छन्।
–––
-1746009348.jpg)
