भेनेजुएलाकी विपक्षी नेता मारिया कोरिना मचाडोले यस वर्षको नोबेल शान्ति पुरस्कार जितेकी छन्।
भर्खरै इसराइल र हमासको युद्ध विराम गराउन सफल भएका अमेरिकी राष्ट्रपति डोनाल्ड ट्रम्पले लामो समयसम्म अभियान चलाए पनि मचाडोले सो पुरस्कार पाएकी हुन्।
५८ वर्षीय मचाडो भेनेजुएलाकी प्रमुख विपक्षी नेता हुन्। निकोलास मादुरोको तानाशाही सरकारले उनलाई गत वर्ष भएको राष्ट्रपतीय निर्वाचन लड्न नदिएपछि उनकै पहलमा एडमुण्डो गोन्जालेजलाई विपक्षीले साझा उम्मेदवार उठाएका थिए।
गोन्जालेजले सो निर्वाचन जिते पनि मादुरोले धाँधली गरेर आफैलाई विजयी घोषणा गरेका थिए। गोन्जालेजको निर्वाचनमा राम्रो प्रदर्शनको श्रेय मचाडोलाई नै दिइन्छ।
ट्रम्पले यसै वर्ष नोबेल शान्ति पुरस्कार पाउनु पर्ने दाबी गर्दै आएका थिए। त्यसकै लागि केही महिनाअघि नर्वेका अर्थमन्त्री जेन्स स्टोल्टेनबर्गलाई उनले अकस्मात् फोन गरेर सो पुरस्कारका लागि आफ्नो दाबी प्रस्तुत गरेका थिए।
अमेरिकाले नेतृत्व गरेको सैन्य गठबन्धन नेटो महासचिवको १० वर्षको कार्यकाल स्टोल्टेनबर्गले गत वर्षको अक्टोबरमा पूरा गरेका थिए।
ट्रम्पको पहिलो कार्यकालमा पनि स्टोल्टेनबर्ग नेटो महासचिव रहेका कारण ट्रम्पको उनीसँग राम्रो चिनजान थियो। त्यसैले उनले स्टोल्टेनबर्गसँग पुरस्कारबारे कुरा गरेका थिए।
स्विडेनका वैज्ञानिक अल्फ्रेड नोबेलको नाममा विभिन्न विधामा दिइने नोबेल पुरस्कार स्विडेनमा रहेको नोबेल फाउन्डेसनले दिन्छ।
नोबेल शान्ति पुरस्कार विजेताको छनोट भने नर्वेली नोबेल समितिले गर्छ। सो समितिमा नर्वेली संसदले सिफारिस गरेका पाँच सदस्य हुन्छन्। त्यसैले ट्रम्पले आफ्नो दाबी पेस गर्न नर्वेली मन्त्रीसँग कुरा गरेका थिए।
नोबेल पुरस्कार पाउने ट्रम्पको उत्कट चाहना छ। उनको पहिलो कार्यकालभन्दा पहिलेका राष्ट्रपति बाराक ओबामाले पनि नोबेल शान्ति पुरस्कार पाएका थिए। ओबामाले केही नगरी नोबेल पुरस्कार पाएको भन्दै ट्रम्पले पहिलो कार्यकालदेखि नै सो पुरस्कारको दाबी गर्दै आएका थिए।
दोस्रो कार्यकालमा पनि उनले बारम्बार त्यसको दाबी गर्दै आएका छन्।
उनलाई खुसी पार्न भारत-पाकिस्तानको युद्ध रोकेको भन्दै पाकिस्तानले अनि इरान-इसराइल युद्ध रोकेको भन्दै इसराइलले नोबेल पुरस्कारका लागि उनलाई औपचारिक रूपमा सिफारिस नै गरेका छन्। आफूले नगरेको कामको पनि श्रेय लिने ट्रम्पले दोस्रो कार्यकालको छ महिनामा छ वटा युद्ध रोकेको दाबी गर्दै आएका छन्।
नोबेल पुरस्कार पाउनकै लागि उनले रूस-युक्रेन युद्ध रोक्न रूसी राष्ट्रपति भ्लादिमिर पुटिनसँग अमेरिकाको अलास्कामा भेट गरेका थिए। त्यसकै लागि भर्खरैउनको इसराइल र हमासको युद्धविराम गराएको मानिन्छ।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
