इसराइली सेनाका प्रमुख प्रवक्ता ब्रिगेडियर जनरल एफी डेफ्रिनले सोमबार अपराह्न हमासले फिर्ता गर्न लागेको चार जना मृतक बन्धकबारे पुष्टि गरेका छन्।
डेफ्रिनका अनुसार हमासले सोमबार साँझ ती मृत बन्धकको शव फिर्ता गर्ने तयारी गरेको 'द जेरूसेलम पोस्ट' ले लेखेको छ।
द जेरूसेलम पोस्टका अनुसार हमासले ती मृतक बन्धकको नाम पनि सार्वजनिक गरेको छ, जसमा विपिन जोशी पनि छन्। त्यसबाहेक गाइ इलाउज, योसी शाराबी र ड्यानियल पेरेज रहेको हमासले जनाएको छ।
विपिन जोशीको अवस्था यसअघि अस्पष्ट थियो। हमासले सोमबार मात्र उनको मृत्यु भइसकेको पुष्टि गरेको हो।
नेपालका सुदूरपश्चिमका जोशीलाई सन् २०२३ अक्टोबर ७ मा हमासले बन्धक बनाएको थियो। उनी इसराइलमा कृषि प्रशिक्षण कार्यक्रमअन्तर्गत काम गरिरहेका बेला अपहरणमा परेका थिए।
यसअघि विपिनको परिवार तथा इसराइलस्थित नेपाली दूतावाससँग भिडियो कन्फरेन्स गरेर इसराइली सरकारले विपिन जीवित नरहेको जानकारी दिएको इसराइलका लागि नेपाली राजदूत धनप्रसाद पण्डितले बताएका थिए।
'इसराइली डिफेन्स फोर्स (आइडिएफ) ले हामी र विपिनको परिवारसँग भिडिओ कुराकानी गरेर ‘हि इज् नो मोर’ भन्ने जानकारी दियो,' राजदूत धनप्रसाद पण्डितले सेतोपाटीसँग भनेका थिए, 'परिवारकै सामु आइडिएफले यो जानकारी दिएको छ।'
भिडिओ कुराकानीमा विपिनकी आमा पद्मा र बहिनी पुष्पा अमेरिकाबाट जोडिएका थिए। परिवारका सदस्य किशोर जोशी, राजदूत पण्डित र इसराइली डिफेन्स फोर्सका अधिकारी उक्त भिडिओ कुराकानीमा सहभागी थिए।
पछिल्लो घोषणापछि 'होस्टेज फ्यामिली फोरम' नामक संस्थाले तत्काल इसराइल–हमासबीचको सम्झौता निलम्बन गर्न माग गरेको छ।
संस्थाले विज्ञप्ति जारी गर्दै भनेको छ, 'हमासले सम्झौता उल्लंघन गरेको छ, त्यसको गम्भीर प्रतिक्रिया इसराइली सरकार र मध्यस्थकर्ताले दिनुपर्छ।'
इसराइली सेनाका अनुसार गाइ इलाउजको मृत्यु सन् २०२३ अक्टोबर ७ मा उनलाई बन्धक बनाइएको ५६ दिनमा भएको जनाइएको छ। योसी शाराबीको मृत्यु भने इसराइली वायुसेनाको आक्रमणपछि बन्धक राखिएको भवन भत्किँदा भएको बताइएको छ।
ड्यानियल पेरेजको मृत्युबारे उनको परिवारलाई सन् २०२४ मार्चमा जानकारी दिइएको थियो।
-1746009348.jpg)
