फरार कैदीबन्दी लुकीछिपी बसेको सूचना आएपछि खोजी गर्न गएका एक जना प्रहरी हवल्दारको अचानक बेहोस भई मृत्यु भएको छ।
सोमबार पोखरा– १३ गौडाको मुखमा फरार कैदीबन्दी लुकीछिपी बसेको सूचना आएपछि प्रहरी हवल्दार ३८ वर्षीय ओमकुमार थापा सहितको टोली त्यसतर्फ गएको थियो। गौडाको मुख पुगेपछि थापा बेहोस भएर ढलेको सूचना आएपछि कास्की प्रहरीले उनको उद्धार गरी पोखरा स्वास्थ्य विज्ञान प्रतिष्ठानमा उपचार गर्न लगेको थियो।
प्रतिष्ठानका चिकित्सकले थापाको मृत्यु भइसकेको जानकारी दिएको कास्की प्रहरीका सूचना अधिकारी डिएसपी हरिबहादुर बस्नेतले जानकारी दिए।
मृतकको पोष्टमर्टम रिपोर्ट आएपछि मात्र मृत्युको कारण थाहा हुने डिएसपी बस्नेतले बताए।
मृतक प्रहरी हवल्दार थापा नवलपुरको विनय त्रिवेणी गाउँपालिका– ६ शिवपुरगढीका स्थायी बासिन्दा हुन्।
उनी जिल्ला अदालत समन्वय तथा सुरक्षा इकाइ कास्कीमा दरबन्दी भई हाल सिआरभी भद्रकालीमा कार्यरत थिए।
घटनाका विषयमा थापाको परिवारलाई जानकारी गराइसकेको प्रहरीले जनाएको छ।
-copy-1761394385.jpg)
-1746009348.jpg)
