मोन्था चक्रवातका कारण मौसम बदली हुँदा पछिल्लो २४ घन्टामा मोरङको सुन्दर हरैँचामा सबैभन्दा बढी २४० मिलिमिटर वर्षा भएको छ।
जल तथा मौसम पूर्वानुमान महाशाखाका अनुसार अभिलेख अनुसार अहिले कर्णाली र सूदुरपश्चिम प्रदेशबाहेक अन्यत्र वर्षा भइरहेको छ।
कोशी प्रदेशका विभिन्न स्थानमा भारीदेखि धेरै भारी वर्षा भएको छ।
सप्तरीको बरमजियामा पछिल्लो चौबीस घन्टामा १५६.६ मिलिमिटर वर्षा भएको छ।
मोन्था चक्रवातको असर अहिले मधेश प्रदेश र कोशी प्रदेशमा बढी परेको जल तथा मौसम विज्ञान विभागका सूचना अधिकारी दिनकर कायस्थले बताए।
यद्यपि बागमतीलगायत प्रदेशमा पनि असर रहँदा बदली र वर्षा भइरहेको छ। उनका अनुसार यो भारी वर्षा हो। दुई सय मिलिमिटर वर्षा नाघेमा अति धेरै भारी वर्षाको सूचीमा राखिन्छ।
सूचना अधिकारी कायस्थका अनुसार पछिल्लो २४ घण्टामा धेरै जिल्लामा भारी वर्षा भएको छ। झापा र उदयपुरमा १ सय मिलिमिटर वर्षा भएको छ।
दुई दर्जन बढी वर्षा मापन केन्द्रमा ५० देखि ८० मिलिमिटरको बीचमा वर्षा भएको छ।
बंगालको खाडीमा विकसित भएको चक्रवात ‘मोन्था’ हाल भारतको मध्य प्रदेश आसपासमा न्यूनचापीय क्षेत्रका रुपमा रहेको र सो प्रणालीको कारणले आज साँझसम्मै प्रभावित हुने सूचना अधिकारी कायस्थले जानकारी दिए। त्यसपछि भने सुधार हुँदै जानेछ।
नेपालमा हाल पश्चिमी वायु र अरब सागरमा बनेको न्यून चापीय प्रणालीको पनि आंशिक प्रभाव रहेको छ।
हाल देशभर साधारणतयादेखि अधिकांश बदली रहेको छ। कोशी प्रदेश, मधेस प्रदेश, बाग्मती प्रदेश र गण्डकी प्रदेशका धेरै स्थानमा, लुम्बिनी प्रदेशका केही स्थानमा हल्कादेखि मध्यम वर्षा भइरहेको छभने कतै धेरै भारी वर्षा भएको छ।
-1746009348.jpg)
